د طالبانو ادارې د ۱۱ بنسټیزو پروژو تړونونه تصویب کړل
د طالبانو د حکومت د اقتصادي مرستیال ملا عبدالغني برادر په مشرۍ د ملي تدارکاتو کمیسیون د سهشنبې په ورځ د ۱۱ بنسټیزو پروژو تړونونه تصویب کړل چې ټولیز لګښت یې له ۱.۵ میلیاردو افغانیو څخه زیات اټکل شوی دی.
په دغو پروژو کې د غور ولایت د هوایي ډګر لپاره د یوې نوې رنوې جوړول، په بغلان ولایت کې د دهنهغوري ولسوالۍ کې له ۱۷ کیلومترو څخه د زیاتو سړکونو جوړول، او د پکتیکا ولایت د زرګرانو له سیمې تر ګردېز ښاره پورې د لارې جوړولو پروژه شامله ده.
سربېره پر دې، په کابل کې د ۲۲۰ کیلوولټه برېښنا د سبسټېشن د سروې، طرحې او تخنیکي ازموینې پروژه هم تصویب شوې ده.
اقتصادي کارپوهان خبرداری ورکوي چې د طالبانو د تدارکاتو پروسه د شفافیت، حساب ورکونې او علمي ارزونې له نشتوالي سره مخ ده، چې دا چاره د منابعو د ضایع کېدو او ناوړه استفادې لامل کېدای شي. د څارونکو ادارو او مدني ټولنې د نشتون له امله، د دغو پروژو عادلانه او اغېزمنې پلي کېدا باندې د ولس باور تر جدي پوښتنې لاندې راغلی دی.
