په فارياب کې د طالبانو د چهل ګزي ولسوال مرستيال ووژل شو
په فارياب ولايت کې ځايي سرچينو تاييد کړې ده چې محمدالدين صفدر، د طالبانو د چهل ګزي ولسوالۍ مرستيال ولسوال، نن سهشنبه د لړم ۲۷مه د ناڅرګندو وسلهوالو په بريد کې وژل شوی دی.
د اطلاعات روز ورځپاڼې د راپور له مخې، دا پېښه هغه مهال رامنځته شوې چې نوموړی له دفتره د موټرسايکل په وسيله خپل کور ته روان و. بريد د هغه د زيږېدو کلي کته ولنګ کې ترسره شوی دی؛ دغه کلي د نوي تاسيس شوې چهل ګزي ولسوالۍ اړوند دی.
دوو ځايي سرچينو چې له اطلاعات روز سره يې خبرې کړې دي، ويلي چې محمدالدين د همدې کلي اوسېدونکی و. تر دا مهاله دا روښانه نه ده چې د دې بريد انګېزه يا عاملين څوک دي، او تر اوسه هېڅ يو کس يا ډلې د دغه ترور مسئوليت نه دی منلی.
که څه هم دا پېښه د طالبانو د ادارې يو مهم سيمه ييز مقام په نښه کوي، خو د دې ادارې چارواکو تر دې دمه په فارياب کې په دې تړاو رسمي غبرګون نه دی ښودلی.
چهل ګزی، چې تازه د فارياب ولايت په چوکاټ کې يوه نوې ولسوالي اعلان شوې، له نسبي ناامنو سيمو څخه شمېرل کېږي؛ هلته تر دې وړاندې هم د طالبانو د ادارې پر کارکوونکو څو بريدونه او نښتې شوې دي.
