د طالبانو اداره د پاکستان پر پوځي پوستو د نويو بريدونو خبر ورکړ
د طالبانو د دفاع وزارت مرستيال وياند ويلي چې د تېرو ۲۴ ساعتونو په اوږدو کې د دغه ادارې ځواکونو پر پاکستاني پوځي مواضعو څو بريدونه کړي دي. د نوموړي په وينا، په دغو عملياتو کې ۱۲ پوستي له منځه تللي او ۴۱ پاکستاني سرتېري وژل شوي دي.
صديقالله نصرت څرګنده کړې چې دا بريدونه په “بېلابېلو ولايتونو” کې ترسره شوي، خو د هدف شويو سيمو دقيق موقعيت يې نه دی ښودلی. ده زياته کړې چې دا اقدامات د هغو کارونو په غبرګون کې شوي چې ده ورته “د پاکستان اقدامات” ويلي دي.
د نوموړي په وينا، نن سهار هم د بلوچستان ايالت په کچلاغ سيمه کې د پاکستان د “اېف سي” ځواکونو پر يو مرکز بريد شوی چې له امله يې يو شمېر پاکستاني پوځيان ټپيان يا وژل شوي دي. خو تر اوسه د پاکستان چارواکو په دې اړه رسمي نظر نه دی څرګند کړی.
د طالبانو ادارې او پاکستان تر منځ د پخوانيو مياشتو په اوږدو کې د پولو تاوتريخوالی زيات شوی او کله کله دا شخړې د ديرند کرښې په اوږدو کې وسلهوالو نښتو ته رسېدلې دي. د دغو پېښو په اړه د شفافيت نشتوالی او د خپلواکو جزئياتو نه ورکول د پولو د سيمو د اوسېدونکو د امنيتي اندېښنو لامل ګرځېدلي دي.
