د طالبانو د ادارې سفیر د اتحاد هوايي شرکت له چارواکو سره د کابل–ابوظبي د الوتنو د پيل په اړه کتنه وکړه
د طالبانو د ادارې سفیر په متحده عربي اماراتو کې د اتحاد هوايي شرکت له پلاوي سره په ابوظبي کې لیدنه کړې ده، چې دواړو لورو د کابل او ابوظبي تر منځ د نېغو الوتنو د پيل په اړه له ۲۸ مارچ څخه خبرې کړې دي. په دې غونډه کې د الوتنو مهالويش، د ترانسپورټ اسانتياوې او د دواړو ښارونو ترمنځ د هوايي تګ راتګ څرنګوالی وڅېړل شو.
د افغانستان د سفارت د خبرپاڼې له مخې، دا کتنه د بدرالدین حقاني او د راحیل صدیق په مشرۍ د يو پلاوي په ګډون ترسره شوې ده. د خبرو اصلي تمرکز د دغو الوتنو د منظم پيل عملي زمينې برابرول بلل شوی دی.
د اتحاد شرکت چارواکو ويلي، دغه شرکت دا مهال ۹۹ ښارونو ته الوتنې لري. د دوی په وينا، د کابل–ابوظبي د الوتنو پيل به د دواړو هېوادونو ترمنځ د اقتصادي او سوداګریزو اړیکو په پراختیا اغېز ولري او ورسره به د افغانستان د نورو سیمو سره د نړيوالې اړیکې زمینه هم برابره شي؛ دا هغه موضوع ده چې د افغانستان د سوداګرو او مسافرو لپاره په اوسنیو اقتصادي شرایطو کې ځانګړې مانا لري.
بدرالدین حقاني د دغو الوتنو د پيل هرکلی کړی او د مسافرو لپاره د هر اړخیزو اسانتیاوو پر تأمين یې ټینګار کړی دی. نوموړي همداراز غوښتنه کړې چې د ټکټ بیې او د سفر اړوند لګښتونه راکم شي؛ دا يوه غوښتنه ده چې د هېواد د اقتصادي ستونزو په حالاتو کې د خلکو لپاره عملي اهمیت لري.
کارپوهان باور لري، چې د نړيوالو الوتنو پراختیا د بانکي او ترانزيټي ستونزو د حل ترڅنګ کولای شي د افغانستان د تګ راتګ او سوداګرۍ یو شمېر ستونزې راکمې کړي؛ خو دوی وايي، د دې بهیر دوام به د هېواد دننه پر باثباته تعاملاتو او اغېزمن مدیریت پورې اړه ولري.
