طالبان: د ايران مېشتو افغان کډوالو وضعيت تر څارنې لاندې دی
د طالبانو د کډوالو د ستونزو د حل کميسیون وايي، د طالبانو اداره د ايران مېشتو افغان کډوالو حالت له نږدې څاري او د تهران او مشهد ديپلوماتيک استازولۍ د دې ادارې د بهرنيو چارو وزارت په همغږۍ سره د کډوالو خدمت ته بوختې دي.
د دې کميسیون وياند احمدالله وثیق ويلي، د افغانستان سفارت او قونسلګري په ايران کې له د کوربه هېواد له چارواکو سره په دوامداره تماس کې دي او د موجودو ستونزو په اړه خبرې کوي. د هغه په وينا، د احتمالي حل لارو موندلو لپاره خبرې اترې هم روانې دي.
دغه څرګندونې په داسې حال کې کېږي چې له دې وړاندې يو شمېر ايراني رسنيو خبر ورکړی و، د امريکا او اسرائيلو له ګډو توغندويي بريدونو وروسته، چې د تهران سوېل ته د ري ښار کې ترسره شوي وو، د يوه افغان کورنۍ شپږ غړي وژل شوي دي. د دې پېښې په اړه تر اوسه رسمي جزئيات نه دي خپاره شوي.
د کډوالو د ستونزو د حل کميسیون وياند زياته کړې، د کډوالو د بېرته ستنېدو زمينه برابره شوې او هڅې روانې دي څو د بېرته راستنېدونکو د چارو ښه سمبالښت وشي. خو د بېرته ګرځېدونکو لپاره د لومړنيو ژوندانه اسانتياوو، کار او سرپناه برابرول هغه مسايل دي چې د کډوالو د حقونو د ملاتړ ادارې تل پرې پوښتنې لري.
له دې مخکې د کډوالو او بېرته راستنېدونکو وزارت وياند هم ويلي و، د افغان کډوالو د خونديتوب د ډاډ لپاره له ايراني مسؤلو ادارو سره اړيکې نيول شوې دي.
په عین حال کې د کډوالو د حقونو فعال عليرضا کريمي ټينګار کړی، چې د طالبانو اداره بايد د بېرته راستنېدونکو خدمتونو او د کډوالو د خوندي وتلو د زمينې چمتو کولو لپاره عملي هڅې وکړي. هغه خبرداری ورکړی، که چيرې د هېواد دننه د واقعي ژوند د بيا پيل حقايقو ته زمينه برابره نه شي، د مهاجرت بهير به لا هم دوام ومومي.
د رسمي آمارو له مخې، نږدې درې ميليونه افغانان په ايران کې ژوند کوي، او هر ډول امنيتي او سياسي بدلون په دغه هېواد کې کولای شي د هغوی پر ژوند مستقيم اغېز ولري. دا هغه موضوع ده چې د طالبانو له ادارې څخه د مسؤلانه او ځواب ويونکي مديريت غوښتنه کوي.
