په تخار کې د ۲۳۸ میلیونه افغانیو په لګښت د نوي پُل د جوړېدو کار پیل شو
د سیمهییزو سرچینو په وینا، د تخار ولایت د درقد ولسوالۍ پر سیند یو ستر پُل د جوړېدو چارې پیل شوي چې لګښت یې ۲۳۸ میلیونه افغانۍ اټکل شوی دی. دغه پُل به د «قغني» په سیمه کې جوړېږي، ۲۴۳ متره اوږدوالی او اووه متره سور لري.
ځایي چارواکي وایي، د دې پروژې له بشپړېدو وروسته به د تخار د مرکز او د درقد، ینګيقلعه او خواجه بهاوالدین ولسوالیو ترمنځ د تګراتګ ستونزې په اساسي ډول راکمې شي. د دغو ولسوالیو اوسېدونکي تر دې وړاندې، په ځانګړي ډول د بارانونو په موسمونو کې، د تګ راتګ له ستونزو شکایت درلود.
په همدې مهال، د بدخشان ولایت چارواکو چې د طالبانو تر ادارې لاندې کار کوي، د ۱۷ پرمختیايي پروژو د پیل خبر ورکړی چې ارزښت یې له ۲۲۳ میلیونه افغانیو زیات دی. دغه پروژې به د بدخشان په مرکز فیضاباد ښار کې پلي کېږي.
د ورکړل شویو معلوماتو له مخې، په دې پروژو کې د پُلونو ترمیم، د استحکامي دیوالونو جوړول، د سړکونو او پلېلارونو جوړول او رغول، د هوايي پُلونو جوړول، د ترافیکي نظم ټینګښت او د ښار ښکلا کارونه شامل دي. خو وګړي تمه لري چې د دغو پروژو د پلي کولو بهیر شفاف وي او د بېلابېلو سیمو اصلي اړتیاوې په عادلانه توګه په پام کې ونیول شي.
