سهیل افریدي: د افغانستان په اړه پټې پرېکړې نه منو
د خیبرپښتونخوا وزیر اعلی سهیل افريدي ویلي چې د افغانستان په اړه د پټو دروازو شاته سیاست جوړونه د منلو وړ نه ده او خلکو ته باید د ټولو پرېکړو په اړه معلومات ورکړل شي. نوموړي ټینګار وکړ چې پاکستان د هېڅ فرد یا ډلې شخصي ملکیت نه دی، بلکې د دې هېواد اصلي مالکین د هغه اتباع دي.
افريدي دا څرګندونې د پشین په یوه ستر ولسي غونډه کې وکړې. هغه په څرګنده د پاکستان د مرکزي حکومت پر سیاستونو نیوکه وکړه او ویې ویل چې کله د سیاست جوړونې په اړه پوښتنې کېږي، منتقدانو ته ویل کېږي «افغانستان ته ولاړ شئ».
د ده په وینا، د ایران اړوند موضوعاتو کې هم کله چې غوښتنه کېږي چې ولس او پارلمان باید په جریان کې وساتل شي، ورته غبرګون ورسره کېږي. افريدي زیاته کړه چې مهمې سیمهییزې پرېکړې باید په شفاف ډول او د ولسي استازو له نظر سره سم وشي.
د خیبرپښتونخوا وزیر اعلی په تېز لحن وویل: «ایا دا پاکستان د ستاسې د پلار ملک دی؟ دا هېواد زموږ دی او موږ یې مالکین یو.» نوموړي څرګنده کړه چې عادي وګړی خپله «ریاست» دی او هېڅوک دا حق نه لري چې د مشروع پوښتنو په ځواب کې خلکو ته د هېواد پرېښودو مشوره ورکړي.
