په شمالي وزیرستان کې د ایازکوت دولتي ښوونځي چاودنه؛ د سلګونو ماشومانو زدهکړې ودرېدې
تېره شپه ناوخته، ناڅرګندو وسلهوالو د شمالي وزیرستان د میرعلي ولسوالۍ په خوشحالي کلي کې د ایازکوت دولتي لومړني ښوونځي ته چاودېدونکي مواد ځای پر ځای کړي وو، چې له امله یې یوه زوروره چاودنه وشوه.
په دې چاودنه کې د یاد ښوونځي ودانۍ په بشپړه توګه نړول شوې، کوم ځای کې چې تر چاودنې وړاندې، له ۶۰۰ ډېرو زدهکوونکو زدهکړې کولې.
د سیمهییزو چارواکو له قوله تر اوسه په دې پېښه کې د انساني تلفاتو راپور نهدی ورکړل شوی، خو د ښوونځي ودانۍ بشپړه نړېدل د سیمې لسګونو ماشومانو د تعلیم بهیر درولی دی.
میرعلي ولسوالي چې د شمالي وزیرستان له ناامنه سیمو شمېرل کېږي، تر دې وړاندې هم د ورته بریدونو شاهده پاتې شوې.
شننونکي وايي، پر ښوونیزو مرکزونو بریدونه نه یواځې د ماشومانو راتلونکی له ګواښ سره مخ کوي، بلکې د سیمې په کورنیو کې د وېرې او بېباورۍ فضا لا زیاتوي.
د کارپوهانو په باور، دا ډول پېښې ښيي چې د پاکستان په قبایلي سیمو کې لا هم د امنیتي ننګونو دوام شته، هغه ځایونه چې وسلوالې ډلې لا هم پکې فعالیت لري.
