سعودي عرب غوښتنه کړې چې د طالبانو او پاکستان ترمنځ منځګړتوب وکړي
د آمو ټلوېزیون د راپور له مخې، سعودي عربستان خپلې لیوالتیا ښودلې چې د طالبانو د ادارې او پاکستان تر منځ د زیاتېدونکو ترینګلتیاوو په کمولو کې منځګړتیا وکړي.
د دې رسنۍ د سرچينو په وینا، ریاض هڅه کوي چې د دواړو خواوو ترمنځ د امنیتي او سیاسي اختلافاتو په کمولو کې منځګړی رول ولوبوي.
تر دې وړاندې، د ایران اسلامي جمهوریت، قطر، ترکیې او روسیې هم چمتووالی ښودلی و چې د طالبانو او پاکستان ترمنځ د منځګړتوب هڅو کې برخه واخلي. یاد هېوادونه د سرحدي سیمو د شخړو له پراخېدو او د هغې د سیمهیزې امنیت پر وضعیت له اغېزو اندېښمن دي.
د طالبانو د ادارې استازو او پاکستاني چارواکو ترمنځ درې غونډې چې تازه د ترکیې په استانبول ښار کې ترسره شوې، د کوم څرګندې پایلې له لاسته راوړلو پرته پای ته رسېدلې دي، چې دا چاره د کړکېچونو د زیاتېدو اندېښنې زیاتې کړې دي.
د طالبانو اداره چې نړیوال مشروعیت نه لري او له خپلو ګاونډیو هېوادونو، په ځانګړي ډول پاکستان سره کړکیچن روابط لري، تر دې دمه د دغو سولې هڅو ته رسمي غبرګون نه دی ښودلی.
د دیورند کرښې په اوږدو کې دوامدارې نښتې د سرحدي ولایتونو زرګونه اوسېدونکي بېځایه کړي او ناامني یې ډېره کړې، چې دا وضعیت د کړکېچونو د راکمولو اړتیا لا روښانه کوي.
