د ماماخېل کانال ترمیم سره د ننګرهار کرنیزې ځمکې بیا خړوبېږي
د ملګرو ملتونو د خوراک او کرنې سازمان (FAO) د نړیوال بانک په همکارۍ د ننګرهار ولایت په ماماخېل سیمه کې د اوبه خور کانال د بیا رغونې چارې بشپړې شوي دي او دا کانال یو ځل بیا ګټې اخیستنې ته سپارل شوی دی.
د ایفاِیاو د معلوماتو له مخې، په دې پروژه کې د کانال ۱٬۶۴۵ متره برخه بیا رغول شوې، له سمنټو پوښل شوې او نوي د اوبو دروازې هم پرې نصب شوي دي. دې اقداماتو ته لاره هواره کړې چې ۱۴۰ هکتاره کرنیزه ځمکه یو ځل بیا خړوبه شي او حاصل ورکونه کابو ۱۰ سلنه زیاته شي.
یاده پروژه د ماماخېل ولسوالۍ له ۶۰۰ څخه ډېرې کروندګرې کورنۍ تر پوښښ لاندې راوستلې، چې ورځنی عاید یې له کرنې سره تړلی دی. مؤثره او دوامداره اوبهوونه نه یوازې د کښت ځمکو ښه والي ته لاره هوارولې، بلکې له دې سره د سیمې د خوړو خوندیتوب هم ځواکمن شوی دی.
دا په داسې حال کې ده چې د طالبانو اداره له هغه را وروسته چې پر افغانستان یې واک ترلاسه کړی، د اوبو زیرمې او بنسټیزو تأسیساتو ته ډېره توجه نه ده کړې، او ډېری دې ته ورته پروژې د نړیوالو بنسټونو په مرسته پلي کېږي. کارپوهان خبرداری ورکوي چې د طالبانو د ادارې لهخوا دا ډول پروژو ته نه پاملرنه کولای شي د خوړو خوندیتوب او د کلیو اقتصاد له جدي ګواښ سره مخ کړي.
