د روسيې خبرداری: لندن او پاریس د اوکراین د اټومي وسلو تسلیح پلان ارزوي
د روسیې د بهرنيو استخباراتو خدمت ویلي چې بریتانیا او فرانسې د یوه پلان ارزونه کوي چې له مخې یې اوکراین ته د اټومي وسلې ورکول شامل دي. د مسکو په وینا، دا کار کېدای شي د اټومي وسلو د نهخپرېدو د تړون (NPT) نقض وګڼل شي. دغه اداره خبرداری ورکړی چې دا ډول ګامونه به د جدي امنیتي خطراتو سبب شي.
د روسي رسنيو د راپورونو له مخې، دا اداره ادعا کوي چې لندن او پاریس دې پایلې ته رسېدلي چې د اوکراین جګړې اوسنی وضعیت د کیف د پوځي بریا تضمین نه کوي، نو ځکه د نویو بازدارنده لارو په لټه کې دي. په راپور کې ویل شوي چې دغو دواړو هېوادونو غوښتنه کړې چې اوکراین لږ تر لږه یوې اټومي بم ته لاسرسی پیدا کړي.
په همدې حال کې، المان د دې طرحې سره د یوځای کېدو مخالفت څرګند کړی دی. د روسیې د بهرنیو استخباراتو اداره ادعا کوي چې بریتانیا او فرانسه ښه پوهېږي چې د داسې وسلې انتقال به د نهخپرېدو تړون د تعهداتو خلاف وي، نو ځکه هڅه کوي دا نوښت د کیف له خوا د یوې وړاندیز په توګه وړاندې کړي.
د دې ادعا له مخې، له احتمالي لارو څخه یوه دا ده چې یو کوچنی اټومي سرګلوله د «تیان ۷۵» له ډول څخه، چې د «ام۵۱.۱» بالستیک توغندي پورې اړه لري او د اوبتل څخه د توغولو وړتیا لري، پټه انتقال شي. مسکو دغه طرحه “ډېره خطرناکه” بللې او خبرداری یې ورکړی چې دا ډول اقدامات کولای شي تاوتریخوالی په اروپا او له هغې هاخوا زیات کړي.
تر اوسه لندن، پاریس او کیف د دې ادعاوو په اړه رسمي غبرګون نهدی ښودلی. د ۲۰۲۲ کال راهيسې پیل شوې د اوکراین جګړه لا هم د اروپا له تر ټولو پېچلو امنیتي کړکېچونو څخه ګڼل کېږي.
