روسیه: چمتو یو د طالبانو او پاکستان ترمنځ د منځګړيتوب لپاره
د طالبانو او پاکستان ترمنځ د تاوتریخوالي د زیاتوالي له امله، د روسیې د بهرنیو چارو وزارت اعلان کړی چې که اړتیا وي، چمتو دی د دواړو خواوو ترمنځ د منځګړيتوب رول ولوبوي.
د دې وزارت ویاندې ماریا زاخارووا د جمعې په ورځ وویل، مسکو د طالبانو او اسلاماباد ترمنځ اوسنی وضعیت د اندېښنې وړ بولي او باور لري چې اختلافونه یواځې د سیاسي او ډیپلوماتیکو خبرو له لارې حل کېدای شي.
زاخارووا زیاته کړه، نړیوالې ټولنې د دې لپاره اجماع کړې چې د طالبانو او پاکستان ترمنځ بحران نور پراخ نه شي، او روسیه هم له خپلو سیمهییزو شریکانو سره هڅه کوي چې د تاوتریخوالي د کمېدو زمینه برابره کړي. هغې وویل، روسیه د منځګړيتوب پوره تجربه لري او چمتو ده هر وخت د سولې لپاره اقدام وکړي.
له روسیې سره هممهاله، ایران هم مخکې څو ځل د منځګړيتوب وړاندیز کړی، خو تراوسه کومه نوې رسمي خبرې اترې نه دي پیل شوي. د طالبانو او پاکستان ترمنځ بېسارې تاوتریخوالي د طالبانو د مهمو متحدینو لکه روسیې، قطر او ایران اندېښنې راپارولي دي.
تازه اختلافونه هغه مهال زیات شول چې د افغانستان ختیځو پولو ته نږدې د یاغیانو بریدونه زیات شول. پاکستان طالبان تورن کوي چې مخالفو وسلوالو ډلو ته پناه ورکوي، خو طالبان تل دغه تورونه رد کړي او پرلهپسې یې د پاکستان سره د ترینګلو اړیکو یادونه کړې ده.
د بحران د کنټرول لپاره د ډیپلوماتیکو هڅو سره ـ سره، تر دې دمه کومه بریالۍ پایله نه ده ترلاسه شوې، او د تاوتریخوالي دوام کولای شي په سیمه کې د ثبات پر راتلونکي ناوړه اغیز وکړي.
