د روسیې او طالبانو استازو په اسلاماباد کې د دوه اړخیزو اړیکو بحث وکړ
د روسیې فدراسیون سفیر آلبرت پي خوورف په اسلاماباد کې د طالبانو د ادارې له استازي مولوي سردار احمد شکیب سره وکتل او د افغانستان او روسیې ترمنځ د روانو اړیکو په اړه یې خبرې وکړې.
دا لیدنه چې په اسلاماباد، د پاکستان پلازمېنه کې ترسره شوه، پر مهمو سیمهییزو او نړیوالو مسایلو هم تمرکز درلود.
د روسیې سفارت دا لیدنه پر خپلې ایکس (پخوانی ټویټر) پاڼې اعلان کړې او ویلي یې دي چې دواړو لورو د دوه اړخیزو همکاریو د پیاوړتیا پر اړتیا ټینګار وکړ.
دغه راز، دوی د سیمې پر امنیتي مسایلو او د آسیا د دایمي سولې او ثبات د ودې لپاره پر عملي ګامونو خبرې وکړې.
دا ډول دیپلوماټیک تعاملات، که څه هم چې رسمي نه دي، خو د طالبانو د ادارې له خوا د خپل نړیوال مشروعیت د تثبیت هڅې ښیي. دا لیدنه داسې مهال ترسره کېږي چې طالبان له بېلابېلو هېوادونو سره اړیکي نیسي، خو لا هم کوم هېواد دوی په رسمي توګه نه دي پېژندلي.
