روسیه د بگرام هوايي اډې ته د امریکا د ځواکونو احتمالي ستنېدنه «بېخي د منلو نه» وبلله
روسیې ویلي چې د امریکا د پوځي ځواکونو هر ډول احتمالي بېرته ستنېدنه افغانستان ته، په ځانګړي ډول د بگرام هوايي اډې بیا پرانیستل، د مسکو لپاره «بېخي د منلو نه» ده. د روسیې د ولسمشر ځانګړي استازي د افغانستان لپاره، ضمیر کابلوف، دا دریځ د ریا نووستي خبري اژانس سره په مرکه کې څرګند کړی دی.
کابلوف ټینګار کړی چې مسکو د امریکا یا ناټو لهخوا د هر ډول پوځي تاسیساتو جوړېدو سره، که په افغانستان کې وي او که په ګاونډیو هېوادونو کې، د هر نوم لاندې، مخالفت لري. هغه هیله څرګنده کړې چې د طالبانو اداره هم په دې برخه کې له روسیې سره همنظر وي.
دغه څرګندونې په داسې حال کې مطرح کېږي چې د امریکا د پوځي حضور په اړه اندېښنې په منځني ختیځ کې زیاتې شوې دي او د ایران سره د تاوتریخوالي د زیاتېدو راپورونه هم خپریږي. ځینې راپورونه ښيي چې واشنګټن کېدای شي د خپلو ستراتېژیکو تګلارو په لړ کې یو ځل بیا د بگرام هوايي اډې ته د لاسرسي هڅه وکړي. دا اډه چې د کابل شمال ته موقعیت لري، د بهرنیو ځواکونو د شل کلنې حضور پر مهال له مهمو پوځي مرکزونو څخه ګڼل کېدله.
د روسیې د ولسمشر ځانګړي استازي، د امریکا د پخوانۍ ولسمشرۍ دورې ته په اشاره سره، ویلي چې له ۲۰۲۱ کال د اګست میاشتې وروسته، کله چې امریکايي ځواکونه له ګډوډۍ سره وتل، واشنګټن په پرلهپسې توګه هڅه کړې چې د بگرام پر اډې بیا کنټرول ترلاسه کړي. هغه زیاته کړې: «په دې غوښتنو کې کوم نوی شی نشته.»
د مسکو دغه پرېکنده دریځ د روسیې پراخې اندېښنې څرګندوي، چې د امریکا او ناټو د نفوذ د پراختیا په اړه نږدې خپلو پولو ته، په ځانګړي ډول په منځنۍ اسیا او افغانستان کې، ډېره جدي اندېښنه لري. دا سیمه د روسیې لپاره ستراتېژیک اهمیت لري.
