روسيه او چين له طالبانو او پاکستانه د خبرو غوښتنه وکړه
روسيه او چين د طالبانو او پاکستان تر منځ د خبرو اترو غوښتنه کړې ده. دا غوښتنه د طالبانو د ادارې ځواکونو او د پاکستان د سرحدي ځواکونو تر منځ د سختو نښتو او هممهاله د پاکستان د هوايي بريدونو له کبله پر کابل او يو شمېر ولايتونو وروسته شوې ده. مسکو د وسلوالو شخړو د پراختيا له امله اندېښنه څرګنده کړې او بېجينګ بيا د بېړني اوربند پر اعلان ټينګار کړی دی.
د روسيې د بهرنیو چارو وزارت وياندې، ماريا زاخارووا، د جمعې په ورځ د حوت پر اتمه نېټه په خپل ایکسپاڼه کې ليکلي چې هېواد يې د طالبانو او پاکستان تر منځ د تاوتريخوالي د زياتېدو له امله اندېښنه لري. د روسيې د بهرنیو چارو وزارت له دواړو لوریو غوښتي چې «خطرناکه تقابل» پای ته ورسوي او اختلافونه د سياسي او ډيپلوماتيکو لارو حل کړي.
په همدې حال کې، د چين د بهرنیو چارو وزارت وياندې، مایو نينګ، وويل چې بېجينګ د دواړو هېوادونو د پولو په اوږدو کې د تاوتريخوالي د زياتېدو له امله ژوره اندېښنه لري. هغې زياته کړه چې چين له طالبانو او پاکستانه غوښتنه کړې چې زغم وښيي او سمدستي اوربند اعلان کړي، څو د نښتو له لا پراخېدو مخنيوی وشي. د هغې په وينا، چين له دواړو خواوو سره د ډيپلوماتيکو لارو له لارې په تماس کې دی او چمتووالی لري چې د تاوتريخوالي په کمولو کې د منځګړې رول ولوبوي.
دا غوښتنې وروسته تر هغه مطرح شوې چې پاکستان پر افغانستان، په ځانګړي ډول پر کابل او يو شمېر ښارونو، هوايي بريدونه وکړل. د پاکستاني چارواکو په وينا، دا بريدونه د هغو حملو په غبرګون کې شوي چې د طالبانو اړوند ځواکونو د دوی پر سرحدي سرتېرو ترسره کړي وو.
د شخړو زياتوالی په داسې حال کې دی چې د طالبانو اداره تر اوسه نه ده توانېدلې له افغانستان ختيځ ګاونډي سره باثباته او له تاوتريخوالي پاکې اړيکې جوړې کړي. دا حالت د پولو سيمو د اوسېدونکو د امنيتي اندېښنو کچه لوړه کړې ده. چين له دواړو خواوو نږدې اړيکې لري او له ۲۰۲۱ کال وروسته يې هم له طالب چارواکو سره خپلې اړيکې ساتلې دي.
