د اوو میاشتو بېپایلې انتظار؛ متقاعدین یو ځل بیا لاریون وکړ
یو شمېر متقاعدینو د دوشنبې په ورځ په کابل کې د تقاعد د عمومي ریاست مخې ته د غونډې په جوړولو سره د طالبانو د ادارې له خوا د خپلو تقاعدي معاشونو د نهورکولو له امله خپل اعتراض څرګند کړ. هغوی وايي، د دې ژمنې له اعلانېدو څخه شاوخوا اووه میاشتې تېرېږي، خو لا هم ډېری متقاعدین کومه اندازه پيسې نهدي ترلاسه کړي. د معترضینو په وینا، یوازې لږ شمېر متقاعدین، په ځانګړي ډول هغه کسان چې په ۱۴۰۰ کال کې تقاعد شوي، توانېدلي دي خپل معاشونه ترلاسه کړي او نور بیا لا هم په انتظار دي. متقاعدین ټينګار کوي چې دغه وضعیت هغوی او د هغوی کورنۍ له جدي اقتصادي ستونزو سره مخ کړې دي. له هغه وروسته چې د طالبانو اداره پر افغانستان مسلطه شوه، د دولتي متقاعدینو د معاشونو د ورکړې بهیر ودرېد؛ هغه اقدام چې په تېرو څلورو کلونو کې څو ځله د متقاعدینو د سړکونو پر اعتراضونو ملګری و. هغوی په دې موده کې څو ځله د تقاعد د عمومي ریاست مخې ته د اعتراضي غونډو په جوړولو سره د خپلو قانوني حقونو د ترلاسه کولو غوښتنه کړې ده. د دغو اعتراضونو له دوام وروسته، د طالبانو مشر هبتالله اخندزاده د ۱۴۰۳ د دلوې په پیل کې په یو اتهمادهیز فرمان کې له متقاعدینو وغوښتل چې د خپلو حقونو د ترلاسه کولو لپاره ځانګړو محکمو ته ورشي. خو معترضین وايي، دا لارښود هم تر اوسه د تقاعدي معاشونو پراخ او منظم تادیه ته نهدی رسېدلی او دوی لا هم د طالبانو د ادارې عملي اقدام ته په تمه دي.
