د طالبانو تر واک لاندې له ۶۴۰ ډېر د خبریالانو د حقونو سرغړونې ثبت شوې دي
د افغانستان د خبریالانو مرکز د «د خبریالانو پر وړاندې د جرمونو د سزا نه معافیت پای ته رسولو نړیوالې ورځې» په مناسبت ویلي، چې له هغه وخت راهیسې چې طالبان په افغانستان کې واک ته رسېدلي، لږ تر لږه ۶۴۰ پېښې د خبریالانو او د رسنیو کارکوونکو پر وړاندې د حقونو سرغړونې ثبت شوې دي.
په هغه اعلامیه کې چې له دې مرکزه خپره شوې، راغلي چې دا شمېرې پنځه د وژنې پېښې هم رانغاړي، چې پکې دوه تنه د افغانستان د ملي راډیو ټلویزیون کارکوونکي دي، چې ویل شوي د پاکستاني ځواکونو په یوه برید کې وژل شوي دي. همچنان، په دې موده کې د ۲۶۵ نه زیات خبریالان نیول شوي دي.
د یاد مرکز د معلوماتو له مخې، په تېرو شلو کلونو کې شاوخوا ۱۳۰ خبریالان او د رسنیو کارکوونکي د جګړې او سازمانمندې جرمونو له امله وژل شوي دي. خو دې بنسټ ویلي، چې تر اوسه د دغو قضیو له ۹۰ سلنه ډیرو کې عدالت نه دی تأمین شوی.
دغه مرکز خبرداری ورکړی چې د مجرمانو عدلي تعقیب نهشتوالی، سره له رسنیو باندې ورځ تر بلې زیاتېدونکو فشارونو او محدودوونکو فرمانونو سره، د افغانستان د دموکراسۍ، پرمختګ او د خلکو پوهاوي ته خطرناکې پایلې لرلی شي.
د افغانستان د خبریالانو مرکز د هغو افغان خبریالانو په اړه هم اندېښنه ښودلې چې له هېواده بهر دي، او ویلي یې دي چې پر دوی د بدنامۍ لپاره کمپاینونه او ناسم معلومات خپرېږي، خو لویې تخنیکي کمپنۍ ورته هېڅ پام نه کوي؛ چې دا چاره د نړیوالو رسنیو د آزادۍ لپاره ستر ګواښ ګڼل کېږي.
دغه بنسټ له طالبانو غوښتي چې د خبریالانو اساسي حقوق باید وپېژني، د رسنیو پر وړاندې د جرمونو د قربانیانو لپاره عدالت تأمین کړي او هغه بېساري محدودیتونه چې پر رسنیز فعالیت لګېدلي دي، باید لېرې کړي.
