په ۲۰۲۵ کال کې له ۲۴ زرو زياتو زلزلهځپلو روغتيايي مرستې ترلاسه کړې
د افغانستان لپاره د نړيوال سرهصليب کمېټې ويلي چې په ۲۰۲۵ کال کې له ۲۴ زرو زياتو زلزلهځپلو کسانو ته بيړنۍ روغتيايي خدمتونه او بنسټيزې مرستې برابرې شوې دي. د دې ادارې په وينا، دغه مرستې هغو کورنيو ته د عاجلو اړتياوو په ځواب کې ورکړل شوې چې د زلزلې له امله زيانمنې شوې وې.
دغه سازمان د پنجشنبې په ورځ، د دلو ۲۳مه، په خپل ایکسپاڼه کې ليکلي چې ورکړل شوي خدمتونه د ټپيانو بيړنۍ درملنه، د درملو او طبي تجهيزاتو برابرول، او همدارنګه د زيانمنو خلکو د وضعيت د ښهوالي لپاره حياتي مرستې پکې شاملې وې. د دې اقداماتو هدف د بحران د فوري پايلو کمول او پر اغېزمنو کسانو د ژوند د بيا رغاونې مرسته ښودل شوې ده.
سرهصليب ټينګار کړی چې د مرستندويه ادارو پر وخت حضور په زيانمنو سيمو کې د خلکو د ژوند په ژغورلو او د روغتيايي بحرانونو د پراخېدو په مخنيوي کې مهم رول لري. دغه نهاد زياته کړې چې له زيانمنونکو ټولنو سره د مرستو دوام لا هم يوه جدي اړتيا ده.
په وروستيو کلونو کې په افغانستان کې مرګوني زلزلې په بېلابېلو سيمو کې د پام وړ تلفات اړولي او زرګونه کورنۍ يې زيانمنې کړې دي. د زېربناوو يو شمېر برخې لکه کورونه، ښوونځي او روغتيايي مرکزونه ويجاړ شوي يا سخت زيانمن شوي دي.
د دغو پېښو له امله، زرګونه کورنۍ بېکوره شوې او د سختو شرايطو سره مخ شوې دي، چې له خوړو، څښاک او مناسبو سرپناوو سره د کمښت ستونزه لري. راپورونه ښيي چې ماشومان، سپينږيري او ناروغان د زيانمنو کسانو له ډلې هغه کسان دي چې له زياتو خطرونو سره مخ دي او دوامدار ملاتړ ته اړتيا لري.
