رحمتالله نبیل د طالبانو د دیني تعبیر او د ښځو پر وړاندې چلند نیوکه وکړه
رحمتالله نبیل، د افغانستان د ملي امنیت پخواني رئیس، په خپلو تازه څرګندونو کې د طالبانو د دیني تعبیر او د ښځو د چلند ډول سخت تر پوښتنې لاندې راوستی دی. هغه ویلي، طالبانو په تېرو کلونو کې د جګړې د دوام او د انسانانو د وژلو لپاره د جامو بدلون او پټېدو ته ځان ته اجازه ورکړې ده، خو همدغه کار یې د ښځو د ژوندي پاتې کېدو لپاره نه منی.
نبیل د یوې افغان نجلۍ د بېلګې په یادولو سره وویل، دغه نجلۍ یوازې د خپلې کورنۍ د نفقې برابرولو او د ژوند د ساتنې لپاره اړ شوې وه چې د نارینه جامې واغوندي او له کوره بهر کار وکړي. د هغه په وینا، دا کار د انتخاب له مخې نه و، بلکې د فقر، بېسرپرستۍ او د بدیلو لارو د نشتوالي نتیجه وه.
د ملي امنیت پخواني رئیس ټینګار وکړ چې د طالبانو په منطق کې له یوې خوا د جامو بدلون د نورو د ژوند اخیستلو لپاره «روا» ګڼل کېږي، خو له بلې خوا د یوې نجلۍ هڅه د خپل او د کورنۍ د ژغورلو لپاره «ناروا» بلل کېږي. هغه دا تضاد د دینی مفاهیمو د سلیقهيي او غیرانساني چلند نښه وبلله.
دغه څرګندونې په داسې حال کې کېږي چې وروستیو راپورونو د طالبانو د ادارې له خوا د یوې افغان نجلۍ د نیول کېدو په اړه خبر ورکړی دی. ویل کېږي دغه نجلۍ د هلکانو په څېر د جامو د اغوستو له امله نیول شوې؛ هغه جامې چې هغې د خپلې بېوزلې کورنۍ د سرپرستۍ او د نفقې د تامین لپاره اړ شوې وه واغوندي.
د دې نجلۍ نیول په ټولنیزو رسنیو کې پراخ غبرګونونه راپارولي دي. ډېرو کاروونکو دا پېښه د ښځو پر وړاندې د سختو محدودیتونو، د ژوند له واقعیتونو د سترګو پټولو او په اوسني افغانستان کې د فقر او مجبوریو د نادیده نیولو نښه بللې ده؛ محدودیتونه چې د منتقدانو په باور، مستقیمه مسؤلیت یې د طالبانو پر اداره راځي.
