طلعت حسین: قطر طالبانو او هند ته د پاکستان سره د تاوتریخوالي د کمولو خبرداری ورکړی
پاکستاني خبریال او شنونکي طلعت حسین ادعا کړې چې قطر د طالبانو ادارې او هند ته ویلي دي له هر ډول کړنو ډډه وکړي چې د پاکستان سره د تاوتریخوالي د زیاتېدو لامل ګرځي. د ده په وینا، دوحې ټینګار کړی چې که دا وضعیت دوام ومومي، نو خپلې مالي مرستې به د طالبانو له ادارې څخه بندې کړي.
طلعت حسین په یو ویډیو کې چې د خپل یوتیوب پاڼې کې یې خپره کړې، ویلي چې قطر د طالبانو له چارواکو غوښتي چې پاکستان ته هېڅ داسې پلمه ورنه کړي چې د لا زیاتو بریدونو باعث شي. د ده په وینا، دغه خبرداری د کابل او اسلاماباد تر منځ د اړیکو د زیاتې حساسۍ له امله ورکړل شوی.
طلعت حسین زیاته کړې چې قطر یو جلا پیغام هم هند ته استولی او له نوي ډیلي یې غوښتي چې د افغانستان له خاورې څخه د پاکستان پر ضد له استفادې ډډه وکړي. نوموړي د دغو پیغامونو د لېږلو څرنګوالي په اړه نور جزئیات نهدي څرګند کړي.
دغه پاکستانی خبریال وايي، د قطر دا هڅه دا ده چې د پاکستان په پولو کې د تاوتریخوالي د زیاتېدو مخه ونیسي او اسلاماباد ته د سیمهییزو خبرو اترو په منځګړیتوب کې د ونډې اخیستو زمینه برابره کړي.
په وروستیو میاشتو کې د طالبانو او پاکستان اړیکې د پورتهکښته بدلونونو شاهدې وې، او د سرحدي سیمو د وسلوالو ډلو فعالیتونه د دواړو اړخونو د شخړو اصلي موضوع بلل کېږي. د طالبانو د ادارې بهرنۍ مالي انحصار هم تل یوه لانجمنه موضوع وه، او د مرستو د بندېدو ګواښونه کولای شي پر سیاسي او امنیتي معادلو اغېز وکړي.
