د پوتین او امام علي رحمان د افغانستان له امنيتي ګواښونو سره تړلې ستونزې وڅېړې
د روسیې ولسمشر ولادیمیر پوتین او د تاجکستان ولسمشر امام علي رحمان د يوې ټليفوني خبرو پر مهال د دواړو هېوادونو پر دوه اړخيزو اړیکو، د سيمې پر وضعيت او له افغانستان سره تړلو امنيتي ننګونو وغږېدل. کرملین ويلي چې دواړو لورو د ستراتيژيکو همکاریو او سیمه ییزې همغږۍ پر پياوړتیا ټینګار کړی، خو د افغانستان په اړه د خبرو ځانګړې جزييات نه دي خپاره شوي.
د رسمي معلوماتو له مخې، د مسکو او دوشنبې ګډه اندېښنه د امنيتي ګواښونو زیاتوالی او د پولو د ثبات ساتل وو. دا اندېښنې په داسې حال کې څرګندېږي چې تاجکستان په وروستیو اونیو کې د سرحدي ناامنۍ ډېروالي راپورونه ورکړي او له افغانستان د سرچینه شوې ناامنۍ پر پایلو اندېښنه ښودلې ده. شنونکي دا وضعیت د طالبانو د ادارې د ناتوانۍ پایله بولي چې نه شي کولای دوامدار امنیت ټينګ او وسلوالې ډلې مهار کړي.
د تاجکستان د ملي امنيت کميټې د دسمبر پر ۲۵ نېټه تایيد کړه چې له هغو وسله والو سره په نښته کې چې له افغانستانه ور اوښتي وو، درې وسله وال او دوه تاجک سرحدي عسکر وژل شوي دي. همدارنګه د دسمبر په لومړیو کې، د افغانستان له خاورې د راپور شوي دوو بريدونو له امله لږ تر لږه پنځه کسان وژل شوي وو.
د دغو پېښو له وروسته، امام علي رحمان د خپل هېواد امنيتي بنسټونو ته لارښوونه وکړه چې د پولو د ساتنې تګلارې له سره وڅېړي او پیاوړې یې کړي. تاجکستان له افغانستان سره اوږده پوله لري او د دغو سيمو امنیت د دغه هېواد د کورني ثبات لپاره ډېر مهم بلل کېږي.
روسیه او تاجکستان له پخوا راهيسې د امنیتي همکاریو اوږد تاریخ لري، چې ګډ نظامي تمرینونه او د استخباراتي معلوماتو تبادله پکې شامله ده. د دغو همکاریو موخه د هغو ګواښونو مخنیوی دی چې د افغانستان او سيمې له مذهبي وسله والو ډلو څخه سرچينه اخلي؛ ګواښونه چې د طالبانو د حکومت د بېثباتۍ او د ځواب ويونکي جوړښت د نشتوالي له امله د سيمې هېوادونه لا هم اندېښمن ساتي.
