پاپ لېو څوارلسم د ټرمپ د اروپايي څرګندونو پر وړاندې غبرګون وښود
د نړۍ د کاتولیکانو مشر پاپ لېو څوارلسم، د امریکا د ولسمشر ډونالډ ټرمپ د وروستیو څرګندونو په غبرګون کې ویلي، چې هغه خبرې د واشنګټن او بروکسل ترمنځ د تاریخي همکاریو د کمزوري کېدو لامل کېدلای شي. نوموړي ټینګار کړی چې د امریکا او اروپا ترمنځ اتحاد د نړیوال ثبات یو اساسي ستن دی او د راتلونکي لپاره د نړیوالو اړیکو ساتنه ډېره مهمه ده.
یورونیوز راپور ورکړی چې پاپ لېو څوارلسم په تازه څرګندونو کې ویلي: «هڅې چې د امریکا او اروپا اړیکو ته زیان ورسوي، د نړۍ بېثباتي زیاتوي.» هغه همداراز ویلي چې اروپايي هېوادونه د اوکراین د سولې د بهیر په ملاتړ کې مهم رول لري.
د پاپ دا څرګندونې وروسته له هغه کیږي چې ډونالډ ټرمپ له پولیتیکو مجلې سره په یوې مرکې کې ویلي چې شونې ده واشنګټن له اوکراین سره خپله ملاتړ کم یا بند کړي. هغه همداراز اروپا «ضعیفه» او «د سقوط پر لوري تلونکې» بللې او د هغه قارې د مهاجرت سیاستونه یې تر نیوکې لاندې راوستي، مدعي شوی چې دا سیاستونه د اروپا ټولنیز جوړښت ته زیان رسولی دی.
د نړیوالو اړیکو شنونکي باور لري چې د پاپ او ټرمپ ترمنځ دا اختلاف د عیسوي نړۍ او د امریکا د محافظهکاره سیاستوالو ترمنځ اړیکو ته یو ځل بیا سیوری اچولی شي. یو شمېر اروپايي ډیپلوماټان هم وایي چې په ځانګړې توګه د اوکراین د بحران په مهال، د اتلانتیک دواړو غاړو ترمنځ اتحاد تر هر وخت مهم دی.
