په افغانستان او پاکستان کې د ۲۰۲۵ کال تر اوسه ۳۹ د پولیو مثبتې پېښې ثبت شوې
نوي څېړنې ښيي چې د ۲۰۲۵ کال په ترڅ کې تر اوسه ۳۹ د پوليوایرس د وحشي ډول (WPV1) مثبتې پېښې په افغانستان او پاکستان کې ثبت شوې دي. د دغو شمېرو له مخې، ۹ پېښې په افغانستان او ۳۰ نورې په پاکستان کې موندل شوې دي.
د چاپېریالي نمونو د پایلو له مخې، ویروس په سیمه کې د خپرېدو په حال کې دی؛ ځکه ټولټال ۶۷۲ مثبتې چاپېریالي نمونې ثبت شوې دي، چې له دې ډلې ۶۴ په افغانستان او ۶۰۸ په پاکستان کې تشخیص شوي دي. دغه نمونې معمولاً له فاضلابو او ورته سرچینو څخه راټولېږي او د پولیو د خپرېدو د کچې د ارزونې یو مهم شاخص بلل کېږي.
د موجودو معلوماتو له مخې، تر اوسه د واکسین پورې اړوند د پولیو هېڅ نوې پېښه نه ده راپور شوې. خو د مثبتو پېښو دوام اندېښنې رامنځته کړې دي چې ښايي د روغتیایي خدمتونو محدود لاسرسی او د واکسین د تطبیق خنډونه پیاوړي کړي.
روغتیایي کارپوهان بیا بیا ټینګار کوي چې په افغانستان کې د طالبانو له لوري د روغتیایي بنسټونو او د واکسین د ټیمونو پر فعالیتونو لګېدلې محدودیتونه کولای شي د پولیو د بشپړې کنټرول پروسه له جدي ننګونو سره مخ کړي؛ موضوع چې بېړنۍ پاملرنې او اغېزمنې همکارۍ ته اړتیا لري تر څو د ماشومانو روغتیا وساتل شي.
