په ننګرهار کې د درې مياشتو وروسته د ګوزڼ نوی پېښه ثبت شوه
د عامې روغتیا وزیر نور جلال جلالي وايي، سره له دې چې د هېواد په کچه پراخ د واکسین کمپاینونه ترسره شوي، درې میاشتې وړاندې د ننګرهار ولایت کې د ماشومانو د ګوزڼ یوه نوې مثبته پېښه ثبت شوې ده. نوموړي دغه څرګندونې د کابل په یوه د پوهاوي غونډه کې وکړې، چې له “ګوزڼ او په دې برخه کې د رسنیو رول” تر سرلیک لاندې د خبریالانو او د سکټوري ادارو ویاندویانو لپاره جوړه شوې وه.
د عامې روغتیا وزیر زیاته کړه چې سږ کال د تېر کال په پرتله یوازې نهه پېښې ثبت شوې دي. د نوموړي په خبره، د هېواد په ختیځو سیمو کې چې پخوانۍ پېښې زیاتې وې، د دې ناروغۍ د خپریدو خطر لا هم پر ځای پاتې دی، او په کلیو او لرو پرتو سیمو کې د عامه پوهاوي پراخول ځانګړی اهمیت لري.
په افغانستان کې د روغتیا نړیوال سازمان (WHO) او د ملګرو ملتونو د ماشومانو د ملاتړ ادارې (یونیسف) استازو هم په دغه ناسته کې له پاکستان سره پر ګډو همکاریو ټینګار وکړ او ویې ویل چې باید د لرې پرتو سیمو ماشومانو ته د واکسین اسانه لاسرسی تضمین شي. دوی همداراز ژمنه وکړه چې دا بهیر به د فلج ناروغۍ تر بشپړ له منځه وړو پورې ملاتړ کوي.
په افغانستان کې د روغتیا نړیوال سازمان استازي خوشحال زمان خبرداری ورکړ چې تر دې دمه چې افغانستان او پاکستان کې د ګوزڼ پېښې صفر ته ونه رسي، د دې ویروس د بیا خپریدو خطر شته. له بلې خوا، په افغانستان کې د یونیسف استازي علي صلات صابري وویل چې دوی هڅه کوي تر څو ټولو ماشومانو ته د واکسین لاسرسی برابر کړي او د ګډې همکارۍ له لارې د خلکو باور ترلاسه کړي.
په همدې حال کې، د عامې روغتیا وزارت وايي سږ کال یې د ماشومانو د ګوزڼ پر ضد نهه پړاوونه د واکسین کمپاینونه ترسره کړي، چې وروستی پړاو یې د راتلونکې اونۍ لپاره پلان شوی. په نړیواله کچه هم، د ابوظبۍ په یوه نړیوال کنفرانس کې د نړۍ مشرانو او روغتیايي بنسټونو ژمنه وکړه چې د ۱.۹ میلیارده ډالرو ځانګړي کولو سره به د ګوزڼ ناروغۍ د بشپړ له منځه وړلو هڅې چټکې کړي.
سره له دې هڅو، د روغتیا کارپوهان او مدني فعالان باور لري چې په هېواد کې د طالبانو د سیاستونو له امله ټولنیزې محدودې او ناامني لا هم د ګوزڼ د بشپړ له منځه وړلو پر وړاندې جدي خنډ دی. دوی له طالبانو غواړي چې روغتیايي کارکوونکو ته د ازاد فعالیت زمينه برابره کړي او هغوی ته دې د خلکو کورونو ته د بې مانعه لاسرسي زمینه ورکړي.
