د پلاستيکي کثافاتو زياتوالی؛ په افغانستان کې نوی چاپېريالي ننګونه
د پلاستيکي کثافاتو زياتوالی، په ځانګړې توګه د کار شويو بوتلونو، په وروستيو کلونو کې په افغانستان کې د يوې جدي چاپېريالي ننګونې په توګه راڅرګند شوی دی. په بلخ ولايت کې د بياکارونې فابريکې د طبيعي سيمو د ککړتيا د کمولو او د هغې منفي اغېزو د مهار لپاره د يو عملي حل په توګه مطرح شوي دي.
په مزارشريف ښار کې لسګونه فابريکې په فعاله توګه پلاستيکي کثافات راټولوي او له پروسس وروسته يې بېرته په داسي موادو بدلوي چې بيا کارېدلی شي. ځينې له دغو فابريکو د کار شويو بوتلونو نه د فايبر يا مصنوعي پنبې توليد ترسره کوي، کوم محصول چې په بېلابېلو صنعتي برخو کې کارول کېږي او د ډېرو اوسېدونکو لپاره يې مستقيم او غير مستقيم د کار زمينه برابره کړې ده.
د بلخ د صنايعو او کانونو د خونې د معلوماتو له مخې، له ۳۰ زياتې د بياکارونې فابريکې په دغه ولايت کې فعالې دي چې له کثافاتو څخه د کارتن، کاغذ، پلاستيکي توکو او مصنوعي فايبر په څېر محصولات توليدوي. د دې ادارې مسئولان وايي چې دغه فابريکې نه يواځې د بېکارۍ په کمولو کې مرسته کوي، بلکې د سيمهييز اقتصاد په پياوړتيا کې هم د پام وړ رول لري.
امامالدين ثناييزاده، د بلخ د صنايعو او کانونو د خونې رئيس، ويلي دي چې د بياکارونې شرکتونه پلاستيکي او کاغذي کثافات راټولوي، پاکوي او بيا يې د نويو محصولاتو د توليد په بهير کې کاروي.
په همدې مهال، د بلخ د صنعت او سوداګرۍ رياست مسئولان د کورنيو توليداتو د ملاتړ د دوام خبره کوي. ناصر احمد نيازي، د دې رياست مرستيال، ويلي دي چې د طالبانو اداره له صنعتکارانو او پانګهوالو سره همکاري کوي څو د توليد برخه پياوړې شي او له وارداتي محصولاتو څخه تړلتيا راکمه شي.
له دې سره سره، د چاپېريال ساتنې کارپوهان ټينګار کوي چې دا بهير تر منظم د کثافاتو د مديريت او د بياکارونې د صنايعو تر شفاف او عملي ملاتړ پرته دوام نهشي کولی. د دوی په باور، په دې برخه کې غفلت هم د ککړتيا د زياتوالي سبب کېدای شي او هم د رامنځته شويو کاري فرصتونو د ناپايدارۍ لامل ګرځېدای شي؛ موضوع چې د اړوندو ادارو له جدي اقدام او ځواب غوښتنې سره تړاو لري.
