د ملګرو ملتونو د افغان کډوالو لپاره نقدي مرستې پای ته نژدې شوي
په پاکستان کې د ملګرو ملتونو د کډوالو عالي کمېشنرۍ (UNHCR) اعلان کړی چې د مالي سرچینو محدودتیا له امله نور نشي کولای ټولو بېرته راستانه شویو افغان کډوالو ته نقدي مرستې برابرې کړي.
د شنبې په ورځ (۲۴ لړم) خپرېدلي خبرپاڼې له مخې، دا بدلون له جمعې ورځې عملي شوی او یواځې هغه بېرته ستانه شوي کسان به نقدي مرسته تر لاسه کوي چې د کمېشنرۍ له خوا ثبت شوي وي یا د پیاوآر کارت (د پناه غوښتنې د ثبت سند) ولري.
ملګرو ملتونو منلې ده چې نړیوال اقتصادي وضعیت د بشري مرستو پر وړاندې بهیر مستقیم اغېز کړی، او دا چاره د افغان کډوالو لپاره د بابرته عزتمنده او دوامداره ستنېدو بهیر له لا زیاتو ننګونو سره مخامخ کوي.
په اعلامیه کې زیاته شوې چې د مرستو دا نوې طریقه به هدفمند وي او یواځې هغو بېرته ستنو شویو ته به متمرکزه وي چې د دې دفتر په سیستم کې ثبت او له پلوه یې زیانمن بلل شوي وي. دا پرېکړه له مخالفت سره مخ شوې، ځکه زرګونه افغانې کورنۍ چې مجبورې شوي بیرته راستنې شي، له لومړنیو مرستو بېبرخې پاتې کېدونکي دي.
د ملګرو ملتونو د کډوالو عالي کمېشنري ټینګار کړی چې د افغان کورنیو له روانو ستونزو څخه خبر دی او که مالي سرچینې برابرې شي، د مرستو پخوانی بهیر به بېرته پیل شي.
د طالبانو اداره چې پر کډوالو فشار راوړي او له نړیوالو ادارو سره همکاري نه کوي، دا بهیر لا سخت کړی. ډېر کارپوهان اندېښنه لري چې د دې بهیر غیر مسئولانه مدیریت کولی شي د لا پراخې او ژورې بشري ناورین لامل شي.
