د پاکستان د علماوو شورا د طالبانو جزایي اصولنامه غیرشرعي وبلله
د پاکستان د علماوو شورا په یوه اعلامیه کې ویلي چې د طالبانو ادارې له لوري ترتیب شوې جزایي اصولنامه د قرآن او اسلامي سنت سره سمون نه لري او شرعي بنسټ نهشي لرلی. دغه اعلامیه د یکشنبې په ورځ، د دلو پنځمه، خپره شوې ده. په اعلامیه کې راغلي، د اصولنامې ځینې برخې نه یوازې اسلامي نه دي، بلکې له غیر اسلامي نظریو سره ورته والی لري، هغه موضوع چې د شورا په وینا د دغو مقرراتو د دینی ماهیت او بنسټ په اړه جدي پوښتنې راپورته کوي. د شورا لهخوا د دغو ورتهوالیونو په اړه نور جزیات نه دي ورکړل شوي. دغه شورا همدارنګه د اسلامي شریعت په نوم د ټولنې په «برده» او «آزاد» وېشلو باندې اندېښنه څرګنده کړې او ټینګار یې کړی چې دا ډول تګلاره د انساني کرامت او د منل شوو اسلامي اصولو سره په ټکر کې ده. د اعلامیې په بلې برخه کې له د طالبانو ادارې غوښتنه شوې چې د خپلې ادعا شوې شرعي واکمنۍ له مخې، خپل دریځ په روښانه ډول د نړۍ پر وړاندې څرګند کړي او د اسلام په نوم د جاهلیت د دورې قوانینو او رواجونو له بیاځلې پلي کولو ډډه وکړي. دا غوښتنه د دغې اصولنامې د قانوني او انساني پایلو په اړه پراخې اندېښنې منعکسوي.
