د پاکستان ولسمشر د طالبانو بېپیلوټه بریدونه وغندل
د پاکستان ولسمشر آصف علي زرداري د طالبانو له لوري د ملکيانو پر ضد د بېپیلوټه بریدونو کلکه غندنه کړې او خبرداری یې ورکړی چې اسلاماباد به پر ملکي وګړو برید هېڅکله ونه زغمي. نوموړي ټینګار کړی چې د افغانستان له خاورې د ګاونډیو هېوادونو پر ضد د بریدونو کارول د منلو وړ نه دي.
د پاکستان د ولسمشر دفتر د شنبې په ورځ، د کب په درېویشتمه، په یوه اعلامیه کې ویلي چې طالبان د دغو بریدونو په ترسره کولو سره «سره کرښه» تېره کړې ده. زرداري په اعلامیه کې څرګنده کړې چې هېواد به یې د هر ډول ګواښ پر وړاندې د خپلې خاورې بشپړتیا او حاکمیت دفاع وکړي.
ولسمشر زرداري دا هم ویلي چې د افغانستان د خاورې د نهکارېدو مسوولیت د طالبانو پر غاړه دی، کومه موضوع چې په وروستیو میاشتو کې د دواړو لورو ترمنځ د ترینګلتیا یو اصلي علت ګرځېدلی دی.
دا څرګندونې داسې مهال کېږي چې د طالبانو اداره د پاکستان د هوايي بریدونو په غبرګون کې ادعا کړې چې پر خیبرپښتونخوا یې هوايي برید ترسره کړی دی. د دغو ترینګلتیاوو زیاتوالی د دواړو هېوادونو د پولو سیمو کې د جګړې د پراخېدو او د ملکي وګړو د احتمالي زیان اندېښنې زیاتې کړې دي.
