د پاکستان د دفاع وزیر له طالبانو سره د خبرو له ناکامۍ د ناامنۍ د زیاتېدو خبرداری ورکړی
په داسې حال کې چې د پاکستان او طالبانو ترمنځ د خبرو درېیم پړاو نن پنجشنبه (د لړم ۱۵مه) په استانبول کې ترسره کېږي، د پاکستان د دفاع وزیر خواجه آصف خبرداری ورکړی چې که دا خبرې ناکامه شي، ښايي د دواړو خواوو ترمنځ امنیتي وضعیت نور هم خراب شي.
آصف د جیو نیوز تلویزیون سره په خبرو کې وویل، که چیرې طالبانو له پاکستان سره پر پوله بریدونه دوام ورکړي، اسلاماباد به هم په ورته اقداماتو لاس پورې کړي. هغه ټینګار وکړ: «که دا بریدونه دوام وکړي، موږ به هم هماغه کار وکړو چې پر موږ کېږي.»
ویل شوي چې د طالبانو د استخباراتو مشر عبدالحق وثیق د چهارشنبې په ورځ ترکیې ته تللی او په خبرو کې به د طالبان استازولي پر غاړه ولري. له بلې خوا، ځینې پاکستاني رسنۍ راپور ورکوي چې د پاکستان د هیئت مشري به د دغه هېواد د استخباراتو مشر عاصم منیر کوي، که څه هم دا خبر تر اوسه د پاکستان له رسمي لوري نه دی تایید شوی.
د طالبانو او پاکستان ترمنځ اړیکې په وروستیو میاشتو کې ډېرې ترینګلې شوې دي. اسلاماباد پر لهپسې له طالبانو تور لګولی چې له افغانستان سره پر پوله کې مېشتو تندلارو ډلو ته اجازه ورکوي چې د پاکستان خاوره په نښه کړي، چې طالبانو دا تورونه رد کړي او د دغو ډلو د کنټرول په برخه کې یې پوره اقدام نه دی کړی.
د وضعیت دوام د سیمې خلک اندېښمن کړي، او که دا راتلونکي خبرې ناکامه شي، د پولې په اوږدو کې د تاوتریخوالي د زیاتوالي لامل کېدلی شي؛ سیمې چې مخکې هم څو وارې د دواړو خواوو ترمنځ د جګړو شاهدې پاتې شوې دي.
