د پاکستان د دفاع وزیر د افغانستان په چارو کې د کلونو رول ومنه او هغه یې تاریخي تېروتنه وبلله
د پاکستان د دفاع وزیر خواجه آصف په یوه نادره وینا کې چې د دې هېواد د ملي اسمبلۍ په غونډه کې یې وکړه، ومنله چې اسلاماباد د څو لسیزو راهیسې د افغانستان په چارو کې ښکېله وه او دا یې یوه «تاریخي تېروتنه» وبلله چې لا هم اغېزې یې دوام لري.
نوموړي وویل، پاکستان د لسیزو په اوږدو کې د لوېدیځو هېوادونو د ګټو لپاره په افغانستان کې د یوې وسیلې په توګه عمل کړی دی. ده څرګنده کړه چې دا سیاستونه د جنرال پروېز مشرف په دوره کې د امریکا د ملاتړ د ترلاسه کولو په موخه تعقیب شوي، خو تر اوسه یې بشپړه ارزونه او بیاکتنه نه ده شوې.
د هغه په وینا، «موږ شاوخوا ۲۲ تر ۲۳ کاله په افغانستان کې ښکېل وو. نن پوښتنه کوو چې ولې په خپل هېواد کې ترهګري زیاته شوې ده؟ دا د هماغو سیاستونو مستقیمه پایله ده.» آصف ټینګار وکړ چې تر هغې چې پاکستان خپلې تېرې تېروتنې و نه مني، ریښتینی اصلاح به ممکنه نه وي.
دا لومړی ځل نه دی چې یو لوړپوړی پاکستانی چارواکی د خپل هېواد د پخوانیو تګلارو په اړه نیوکه کوي. له دې وړاندې هم د پاکستان دفاع وزیر منلې وه چې اسلاماباد د درې لسیزو لپاره د امریکا او نورو لوېدیځو هېوادونو د ګټو لپاره له ځینو وسلهوالو ډلو ملاتړ کړی دی.
په تازه غبرګونونو کې، عزیز مرج، د پاکستان پخواني دیپلومات، ویلي چې دا ډول څرګندونې د افغان جګړې او تېر سیاستونو له مسؤلیت څخه د ځان خلاصولو هڅې دي. ده ادعا وکړه چې دغه سیاستونه زیاتره د مالي ګټو لپاره تعقیب شوي او د پاکستان د ثابت سیاسي تګلارې برخه ګرځېدلي دي.
په وروستیو کلونو کې، د پاکستان چارواکو بیا بیا افغانستان تورن کړی چې د دغه هېواد د خاورې د بریدونو تر شا لاس لري. خو د پاکستان د دفاع وزیر وروستۍ څرګندونې یې د اسلاماباد د پخوانیو دریځونو او د دغه هېواد د امنیتي نقشې په اړه نوي پوښتنې راپارولي دي.
