د افغانستان له پولې د وتلو وروسته په پاکستان کې د بریدونو د کمېدو راپور خپور شو
د پاکستان د امنیتي څېړنو او مطالعاتو مرکز په خپل نوي راپور کې ویلي، د افغانستان سره د پولو د تړل کېدو او محدودیتونو لګولو له امله، په دغه هېواد کې له سرحده اوښتونکي ترهګریز بریدونه او د تاوتریخوالي له امله تلفات په څرګند ډول کم شوي دي.
د راپور له مخې، په پاکستان کې د ترهګرۍ بریدونه د دسمبر په میاشت کې شاوخوا ۱۷ سلنه راکم شوي، او دا کمېدونکې لړۍ د نومبر په میاشت کې هم نږدې ۹ سلنه ثبت شوې ده. دغه بنسټ زیاتوي، د ملکي وګړو او امنیتي ځواکونو تلفات هم د ۲۰۲۵ کال په وروستیو درې میاشتو کې راکم شوي، چې په نومبر او دسمبر کې یې په ترتیب سره ۴ او ۱۹ سلنه کمښت ښودلی دی.
سره له دې، راپور ټینګار کوي چې که څه هم دا موقتي کمښتونه لیدل کېږي، خو د ۲۰۲۵ کال په اوږدو کې د تاوتریخوالي د عمومي زیاتوالي له کبله، دا کال په تېره لسیزه کې د پاکستان تر ټولو تاوتریخ کال بلل شوی دی. د کلنیو احصایو له مخې، د تاوتریخوالي عمومي کچه د تېر کال په پرتله شاوخوا ۳۴ سلنه لوړه شوې ده.
د پاکستان د امنیتي څېړنو مرکز یادونه کړې چې له ۲۰۲۱ کال راهیسې، کله چې طالبان په افغانستان کې بیا واک ته ورسېدل، پاکستان پرلهپسې د تاوتریخوالي د زیاتېدو شاهد دی؛ هغه لړۍ چې په دغه هېواد کې پراخ امنیتي اندېښنې راولاړې کړې دي.
د راپور په بله برخه کې ویل شوي چې د ۲۰۲۴ او ۲۰۲۵ کلونو پرتله ښيي، د ترهګرۍ او د هغې پر ضد عملیاتو سره تړلي تلفات په ټول پاکستان کې په شدت سره ډېر شوي، او د وژل شویو شمېر له ۲۵۵۵ کسانو څخه ۳۴۱۷ ته رسېدلی دی.
د دې څېړنو له مخې، خیبرپښتونخوا د ۲۰۲۵ کال په تر ټولو ناامنه ایالت بدله شوې، چیرې چې د وژل شویو شمېر د پخوا په پرتله په څرګند ډول زیات شوی او د هېواد د ټول تلفات زیاتره برخه یې خپله کړې ده. بلوچستان هم د تلفات د زیاتوالي له امله د تاوتریخوالي د پورته کېدو تجربه کړې ده.
دا راپور په داسې مهال خپرېږي چې د پاکستان چارواکو څو ځله د طالبانو اداره تورنه کړې چې د تحریک طالبان پاکستان په ګډون د حکومت ضد وسلوالو ډلو ته پناه ورکوي. خو د طالبانو اداره دغه تورونه تل رد کړي، خو د سرحدي سیمو دوامداره ناامنۍ او تاوتریخوالي د دغې ادارې پر رول او مسوولیت پوښتنې او نیوکې لا پیاوړې کړې دي.
