پاکستان د بېپیلوټه الوتکو پروازونه تر نا معلومې مودې بند کړي
د پاکستان د کورنیو چارو وزارت اعلان کړی چې د هېواد په ټولو سیمو کې د بېپیلوټه الوتکو پروازونه تر بلې خبرتیا پورې منع دي. دا پرېکړه له هغو انتقامي بریدونو وروسته شوې چې د افغانستان پورې تړاو لري، او د چارواکو په وینا، سملاسي عملي شوې ده.
د جیو نیوز د راپور له مخې، پاکستاني چارواکو خبرداری ورکړی چې هر څوک دا حکم مات کړي، له قانوني چلند سره به مخ شي. دا بندیز د بېپیلوټه الوتکو شخصي او سوداګریزو کارونو دواړه رانغاړي.
خو د استخباراتي ادارو لهخوا د بېپیلوټه الوتکو کارونه له دې فرمانه مستثنی اعلان شوي دي. چارواکو د دې استثنا د شرایطو په اړه نور جزئیات نه دي ورکړي.
په همدې وخت کې، د خیبرپښتونخوا ولایتي ادارې هم اعلان کړی چې د دغه ایالت په خلاصو هوايي ساحو کې به د بېپیلوټه الوتکو پروازونه د ۳۰ ورځو لپاره بند وي. د دې ادارې په خبرپاڼه کې ویل شوي، په اوسني وضعیت کې هر ډول فعالیت چې د بېپیلوټه الوتکو سره تړاو لري — که د اجازې سره وي او که بې اجازې — د خلکو د ژوند او شتمنۍ، دولتي تأسیساتو او عام نظم لپاره مستقیم یا غیرمستقیم ګواښ جوړېدای شي.
