په بلوچستان او خيبر پښتونخوا کې ناامنۍ زياتې شوې دي
د پاکستان د کورنيو چارو وزير ويلي چې د بلوچستان او خيبر پښتونخوا په ايالتونو کې د ناامنۍ کچه لوړه شوې او د امنيتي پېښو لړۍ هره ورځ روانه ده. نوموړي همداراز هند تورن کړی چې د دې دوو ايالتونو په وروستيو ترهګريزو بريدونو کې لاس لري.
محسن نقوي د لاهور په يوه خبري غونډه کې وويل چې د دغو دوو ايالتونو د ځينو سيمو امنيتي وضعيت د اندېښنې وړ دی. د هغه په وينا، د هند حکومت د تازه بريدونو تر شاه دی، خو د هند چارواکو تر اوسه په دې اړه ښکاره غبرګون نه دی ښودلی.
په تازه پېښه کې د خيبر پښتونخوا د باجوړ په ولسوالۍ کې يو بمځای شوي موټر چاودنه کړې چې له امله يې ۱۱ پاکستاني سرتېري وژل شوي دي. دا بريد د دې سيمې له وروستيو تر ټولو خونړيو پېښو څخه ګڼل شوی.
بلوچستان او خيبر پښتونخوا د پاکستان له هغو ايالتونو څخه دي چې په تيرو کلونو کې يې د وسلوالو ډلو فعاليتونه او خپلسري بريدونه تجربه کړي دي.
