د پاکستان د پوځ مشر: د افغانستان له خاورې د بریدونو کارول د منلو وړ نه دي
د پاکستان د پوځ د ستاد مشر، جنرال عاصم منیر، د شورو پر ورځ د جنوبي وزیرستان د سفر پر مهال وویل چې د افغانستان له خاورې څخه د وسلوالو بریدونو ترسره کول د پاکستان پر ضد «د منلو وړ نه دي». نوموړي ټینګار وکړ چې د پولو امنیت د اسلاماباد لپاره سره کرښه ده.
د پاکستان د پوځ د اعلامیې له مخې، منیر په دې سفر کې له هغو ځواکونو سره لیدنه کړې چې د افغانستان د پولې ترڅنګ ځای پر ځای دي، او د قبایلي سیمو د امنيت د ټينګښت لپاره یې د عملیاتو پر دوام ټینګار کړی دی. هغه له پوځیانو غوښتنه وکړه چې د سرحدي ګواښونو په وړاندې هوښیار پاتې شي.
د پاکستان د پوځ مشر یو ځل بیا ادعا وکړه چې د بلوڅو وسلوال او د تحریک طالبان پاکستان (ټيټيپي) غړي د افغانستان له خاورې د بریدونو د پلان او پلي کولو لپاره ګټه اخلي. پاکستاني چارواکو له دې مخکې هم په ځلونو دغه شان ادعاوې کړې دي.
بل لور ته، د طالبانو اداره تل دا تورونه رد کړي او ویلي یې دي چې د افغانستان له خاورې به د بل هېواد پر ضد د بریدونو اجازه ورنه کړي. خو د دغو کړکېچونو دوام او د پاکستان له لوري د امنیتي ادعاوو تکرار دا پوښتنې راولاړې کړې دي چې د طالبانو اداره د پولو پر ټولو سیمو څومره کنټرول لري او د وسلوالو ډلو اداره په افغانستان کې څنګه ترسره کېږي؛ هغه موضوع چې د دواړو غاړو پر اړیکو او د پولو د سیمو د اوسېدونکو پر امنیتي وضعیت مستقیم اغېز لري.
