پاکستان وايي له افغانستان سره دیپلوماتيکې اړیکې لا فعالې دي
د پاکستان د بهرنیو چارو وزارت اعلان کړی چې له شخړو سره سره، د اسلاماباد او کابل ترمنځ دیپلوماتیک کانالونه لا هم فعال پاتې دي او د دواړو ګاونډیو هېوادونو اړیکې دوام لري. دا موضوع د پنجشنبې په ورځ په اسلاماباد کې په یوه اونیز مطبوعاتي غونډه کې مطرح شوه.
د دې وزارت ویاند، طاهر حسین اندرابي، ټینګار وکړ چې هېواد يې د افغانستان په کورنیو چارو کې مداخله نه کوي، خو زیاته يې کړه چې د افغانستان له خاورې د ترهګریزو فعالیتونو کارول د پاکستان اصلي اندېښنه ده. نوموړي څرګنده کړه چې اسلاماباد له کابل واکمنو څخه د “ليکل شويو، د تصدیق وړ او عملي” تضمينونو غوښتنه کوي څو ترهګرې ډلې له منځه يوړل شي.
د اندرابي په وينا، بې له دې څرګندو ژمنو د ترهګرۍ ستونزه نهشي حل کېدای او که دا اندېښنه له منځه يوړل شي، د دواړو هېوادونو د اړیکو د پام وړ ښهوالي زمینه به برابره شي؛ ځکه، د ده په وینا، دواړه هېوادونه نور ستر اختلافونه نه لري. دا څرګندونې په داسې حال کې کېږي چې د طالبانو اداره د پاکستان ادعاوې تل بېاساسه بللې او ويلي يې دي چې د افغانستان خاوره د هېڅ هېواد پر ضد نه کارېږي.
د کابل او اسلاماباد اړیکې وروسته له هغې جدي خرابې شوې چې په اکتوبر ۲۰۲۵ کې د سختو پوځي نښتو یوه پېښه وشوه. که څه هم د اکتوبر په ۱۹مه اوربند اعلان شوی، خو د دواړو لوریو ترمنځ سوداګري لا نهده بېرته پيل شوې. څارونکي وايي، د ناامنۍ دوام او د طالبانو د حکومت له لوري د شفاف ځواب نشتوالی د باور د بیا جوړېدو او دایمي همکارۍ لپاره اصلي خنډ ګڼل کېږي.
