په لوېديځې غاړې کې د رمضان له پيل راهيسې تر سل زيات فلسطينيان نيول شوي
د فلسطيني بنديانو مرکز اعلان کړی چې د اسرایيلو ځواکونو د مبارک رمضان له پيل راهيسې تر دې دمه له سل زيات فلسطينيان، چې ښځې او ماشومان هم پکې شامل دي، په بېلابېلو سيمو کې د لوېديځې غاړې او قدس له سيمو نيولي دي. د دې ادارې په وينا، دا نيونې د رمضان په مياشت کې د پوځي عملياتو له شدت سره هممهاله شوې دي.
د ياد مرکز د معلوماتو له مخې، د نيولو پېښې په ډېرو سيمو، په ځانګړي ډول په قدس کې ثبت شوې دي او د ميداني پوښتنو او پلټنو لړۍ هم په څرګنده توګه زياته شوې ده. دغه نهاد وايي، دا تازه اقدامات د هغه څه برخه ده چې “ډلهييزه سزا” بلل کېږي او د فلسطيني ټولنې بېلابېلې برخې يې په نښه کړې دي.
د فلسطيني بنديانو مرکز همداراز راپور ورکړی چې له هغه وخته چې جګړه په غزه کې پيل شوې، تر ۲۲ زره زيات فلسطينيان نيول شوي دي. د دې مرکز په باور، د نيونو او پوځي عملياتو کچه په بېساري ډول لوړه شوې ده.
په راپور کې يادونه شوې چې د نيول شوو کسانو د سخت وهلو، د کورونو ورانولو، د شتمنيو ضبط، او د ملکي زيربناوو د زيانمنېدو پېښې هم ثبت شوې دي. دغه راز، ادعا شوې چې د کورنيو غړي د ګروګانو په توګه کارول، د بنديانو د انساني سپر په توګه ګومارل او د ميداني اعدامونو تر سره کول له هغو کړنو څخه دي چې په ځينو مواردو کې ثبت شوي دي.
د فلسطيني بنديانو مرکز ټينګار کړی چې دا تګلاره د فلسطيني ټولنې پر وړاندې د اوږدمهالو پالیسیو يوه برخه ده، خو د يادې ادارې په وينا، د غزې د وروستيو نښتو له پيل وروسته د دغو کړنو شدت او پراخوالی په څرګند ډول زيات شوی دی. دا مرکز زياتوي چې د منظمې نيونې بهير لا هم دوام لري.
