نتانیاهو د ګرځنده پناهځای سره د عراد سيمې ته ولاړ
د اسرایيلو صدراعظم بنیامین نتانیاهو نن د تېرې شپې هغو بریدونو وروسته، چې وېل کېږي له ایران سره تړاو لري، د اشغال شويو سيمو سويل ته په عراد سيمه کې ولاړ. دغه سفر د یو ګرځنده پناهځای له امله، چې له هغه سره ملګری و، د عبري ژبو رسنيو پراخ پام ځان ته راواړاوه.
د عبري رسنيو د راپورونو له مخې، د نتانیاهو د لیدنې پر مهال، د هغه امنیتي ټیم په سیمه کې یو موټر چې په ګرځنده پناهځای سمبال و، ځای پر ځای کړی و. د دغو رسنيو په وينا، دا کار د صدراعظم د لا زيات امنیت لپاره ترسره شوی و.
خپرې شوې انځورونه ښيي چې دغه پناهځای د لیدنې په ټوله موده کې د نتانیاهو نږدې ولاړ و او د پروګرام له پای ته رسېدو وروسته د امنیتي کاروان سره یوځای له سیمې ووت.
عراد د اسرایيلو په سويل کې موقعيت لري او په وروستيو ورځو کې د اسرایيل او ايران ترمنځ د تاوتريخوالي د زياتېدو له امله د بریدونو هدف ګرځېدلې ده. تر اوسه د احتمالي تاوانونو په اړه نور جزئیات نه دي خپاره شوي.
