ناټو خپلې ځواکونه له عراق نه اروپا ته انتقال کړل
د ناټو پوځي ائتلاف اعلان کړی چې د عراق له خاورې یې ټول هغه ځواکونه وایستل چې د دې ائتلاف د ماموریت برخه وو او دا ځواکونه یې د امنیتي شرایطو خرابېدو او د تاوتریخوالي د زیاتېدو له امله اروپا ته انتقال کړي دي. دا پرېکړه په داسې حال کې شوې چې د عراق په ځینو سیمو کې امنیتي وضعیت د اندېښنې وړ بلل شوی دی.
د بي بي سي د راپور له مخې، د ناټو ماموریت په عراق کې جنګي بڼه نه درلوده او د دې ماموریت اساسي تمرکز په سلا مشورو ورکولو او د پایداره او اغېزمنو امنیتي بنسټونو په جوړولو متمرکز و. ائتلاف ټینګار کړی چې په پوځي عملیاتو کې یې برخه نه درلوده او د دوی رول یوازې حمایوي او روزنیز و.
ناټو په یوه اعلامیه کې زیاته کړې چې د ځواکونو له انتقال وروسته به د دې ماموریت چارې د دغې اتحادیې د قوماندانۍ له مرکز څخه، چې په ایټالیا کې د ناپل په ښار کې دی، پرمخ وړل کېږي. د ائتلاف په وینا، د عراق له امنیتي ځواکونو سره د ګډو همکاريو دوام به د دغه مرکز له لارې تنظیمېږي.
ارلکسوس ګرینکویچ، چې د ناټو متحدو ځواکونو په اروپا کې مشر قوماندان دی، له عراقي چارواکو او د ائتلاف له متحدانو څخه د ځواکونو د خوندي وتلو په بهیر کې د همکارۍ مننه کړې ده. نوموړی وایي، د ناټو د کارکوونکو انتقال له عراقه د عراق د جمهوریت او د ائتلاف د شریکانو په ملاتړ په خوندي ډول ترسره شوی دی.
