فوکوس: پر نطنز برید د ټرمپ ناتواني څرګنده کړه
د جرمني مجلې «فوکوس» په يوه تازه راپور کې ليکلي چې د امريکا او اسرائيلو هڅه د نطنز د اټومي تاسيساتو د بريد لپاره، د امريکا د ولسمشر ډونالډ ټرمپ ناتواني د ايران له سره د کړکېچ په اداره او دوام کې څرګندوي. دغه مجله خبرداری ورکړی چې دا ډول اقدام کولای شي د سيمې لپاره پراخې پایلې ولري.
د مهر خبري اژانس د راپور له مخې، فوکوس ټينګار کړی چې ټرمپ د پوځ له لا زياتو مشورو او همغږۍ پر ځای، د اخري التيماتوم د ورکولو لاره خپله کړې ده. د مقالې ليکوال په انتقادي لحن ليکلي چې دا تګلاره ښيي هغه د داسې بحرانونو د مقابلې لازم چمتووالی نه لري.
په همدې حال کې، د ايران د اټومي انرژۍ سازمان د شنبې په ورځ اعلان وکړ چې د نطنز اټومي تاسيسات د اسرائيلو او امريکا د بمبارۍ هدف ګرځېدلي دي. دغه سازمان زياته کړه چې د دې بريد له امله هېڅ ډول راډيو اکتيف مواد نه دي خپاره شوي او د سيمې اوسېدونکي له هېڅ ګواښ سره نه مخ دي. د يادې ادارې په وينا، دغه بريد د نړيوالو اټومي خوندیتوب د معيارونو ښکاره سرغړونه ده.
د روسيې د بهرنيو چارو وزارت وياندې، ماريا زاخارووا، هم غوښتنه کړې چې د ملګرو ملتونو سازمان او نړيواله اټومي انرژۍ اداره دې دا پېښه په عيني ډول وڅېړي او ارزونه دې وکړي. هغې روښانه کړې چې د نطنز د يورانيمو غني کولو تاسيسات، چې د اژانس تر څار لاندې دي، سره له دې چې تېر جون مياشت کې د ايران د اټومي پروګرام د «بشپړې له منځه وړلو» ادعاوې شوې وې، بيا هم د بريد لاندې راغلي دي.
د نطنز تاسيسات د ايران له اصلي اټومي غنيسازۍ مرکزونو څخه شمېرل کېږي او هر ډول نظامي اقدام پر هغه، کولای شي سيمه ييزې او نړيوالې سياسي او امنيتي اغېزې ولري.
