سراجالدین حقاني د کابل د ښاروال د ښار وده او بيا رغونې هڅې وستايلې
د طالبانو د کورنيو چارو وزارت اعلان کړی چې خليفه سراجالدين حقاني، د کورنيو چارو وزير، په يوه رسمي غونډه کې د مولوي عبدالراشيد بلوچ، د کابل ښاروال، د بيا رغونې او ښاري ودې په برخه کې د هڅو ستاينه کړې ده.
د دې وزارت د معلوماتو له مخې، ښاغلي حقاني په خپلو خبرو کې پر ښاري امنيت، د کابل په سيمو کې د نظم او د هېواد پر ابادۍ تمرکز کړی او د کابل ښاروالۍ فعاليتونه يې د همدې موخو په چوکاټ کې ارزولي دي.
همدارنګه، د کورنيو چارو وزير د کابل د امنيې قوماندان، د استخباراتو رئيس او د کابل د مرکزي قول اردوی قوماندان ترمنځ د همغږۍ او هغه څه چې «لاسته راوړنې» بلل شوي، ستاينه کړې ده.
دا څرګندونې په داسې حال کې شوې دي چې د طالبانو اداره تل د خپلو لاسته راوړنو يادونه کوي، خو خپلواکه ادارې او د کابل اوسېدونکي په څرګند ډول د دغو اقداماتو د معيارونو، پروګرامونو او د خلکو پر ورځني ژوند د اغېزو په اړه نه خبرېږي.
د خپرو شویو معلوماتو له مخې، د کورنيو چارو وزير ترڅنګ، ملا محمد يونس آخوندزاده د کليو بيا رغونې او پراختيا وزير، شيخ حمدالله نعماني د مخابراتو او معلوماتي ټکنالوژۍ وزير، مولوي احمد جان بلال د امارتي شرکتونو عمومي رئيس او د طالبانو د ادارې يو شمېر نور مسوولان په دې مراسمو کې حاضر وو.
