ملا برادر د هېوادونو او طالبانو ترمنځ د تعامل غوښتنه وکړه
ملا عبدالغني برادر، د طالبانو د ادارې د رئيس الوزرا اقتصادي مرستیال، د هېوادونو او د طالبانو د ادارې ترمنځ د سياسي او اقتصادي تعامل پر اړتيا ټينګار کړی او ويلي يې دي چې دغه ډول اړيکې بايد د اسلامي امارت د ارزښتونو او اصولو په چوکاټ کې تعقيب شي.
نوموړي څرګنده کړې چې د ده په باور هغه انرژي او سرچينې چې د ده په وينا د يو بل د له منځه وړلو لپاره مصرفېږي، کولای شي په اغېزمنه توګه د متقابل ملاتړ او د هېوادونو ترمنځ د ګډو ټکو د پياوړتيا په لور وکارول شي.
دغه څرګندونې په داسې حال کې کېږي چې د طالبانو اداره لا هم د نړيوالې ټولنې له خوا د يو قانوني حکومت په توګه نه ده پېژندل شوې او نيوکې د محدوديتونو، په ځانګړي ډول د بشري حقونو او سياسي ګډون په برخه کې، دوام لري.
منتقدان ټينګار کوي چې له طالبانو سره هر ډول دوامدار او مانادار تعامل د څرګندو بدلونونو، د افغانستان د وګړو د بنسټيزو حقونو د درناوي او د نړيوالې ټولنې د غوښتنو پر وړاندې د حساب ورکونې غوښتنه کوي.
