مجاهد: د اوربند د غځولو غوښتنه ډېره پاکستان ته متوجه ده
ذبیحالله مجاهد، د طالبانو د حکومت ویاند، د افغانستان او پاکستان د یو شمېر دیني عالمانو د هغې غوښتنې په غبرګون کې چې تر د قربانۍ تر اختره د اوربند د غځېدو غوښتنه یې کړې ده، ویلي چې دا پیغام یې زیاتره پاکستان ته متوجه دی او طالبان د جګړې پیل کوونکي نهدي. هغه ټینګار وکړ چې دا اداره ځان په دفاعي حالت کې بولي او د ده په وینا، د پاکستان خاورې ته هېڅ «تیری» نهدی شوی.
د طالبانو تر ادارې لاندې د افغانستان دولتي تلویزیون د چارشنبې په ورځ (د وري پنځمه) د مجاهد یو غږیز پیغام خپور کړ. هغه په دغه پیغام کې وویل چې د خلکو د دفاع مسؤلیت پر خپله غاړه بولي او ادعا یې وکړه چې جګړې د طالبانو له لوري نه دي پیل شوې.
دغه څرګندونې په داسې حال کې شوي چې د سې شنبې په ورځ د افغانستان او پاکستان یو شمېر دیني عالمانو په یوه ګډه لیک کې تر د قربانۍ تر اختره (د جوزا شپږمه) د اوربند د غځېدو غوښتنه وکړه. دوی له کابل او اسلامآباد غوښتنه وکړه چې د کړکېچ د زیاتېدو پر ځای، خبرې اترې او مذاکرات د سولې د ټینګښت لپاره په لومړیتوب کې ونیسي.
د طالبانو او پاکستان ترمنځ اوربند چې د عربستان سعودي، ترکیې او قطر منځګړیتوب له لارې ټینګ شوی و، د دوشنبې په نیمه شپه (د مارچ ۲۳) پای ته ورسېد. د اوربند پای ته رسېدل د دې احتمال زیات کړی چې ښایي جګړې د پولې په اوږدو کې پراخې شي.
په اختر ورځو کې، د طالبانو اداره پاکستان پر دې تورنه کړه چې اوربند یې مات کړی. په ورته مهال، د نورستان او کنړ یو شمېر اوسېدونکو ویلي چې د پاکستاني ځواکونو له خوا د اوربند په موده کې هم د پولو سیمې د راکټي بریدونو لاندې راغلې دي، چې د دوی په وینا، ملکي تلفات یې درلودلي.
په عین وخت کې، د یو شفاف او باوري میکانیزم نشتوالی چې د اوربند څارنه وکړي او د دواړو لوریو ادعاوې وڅېړي، یو ځل بیا دا پوښتنه راولاړه کړې چې د پولي د شخړو د مدیریت او د ملکي وګړو د خوندیتوب مسؤلیت به څنګه تضمین شي.
