مادورو په نیویارک محکمه کې: زه د وینزویلا ولسمشر یم
د وینزویلا ولسمشر نیکولاس مادورو په نیویارک کې د یوې لنډې محکمې غونډې ته حاضر شو او د ټولو جرمونو د رد تر څنګ یې ټینګار وکړ چې هغه د خپل هېواد ولسمشر ګڼي او بېګناه دی. نوموړي قاضي ته وویل چې په کاراکاس کې په خپل کور کې نیول شوی او ځان د جګړې بندي بولي.
د رویټرز او الجزیرې په ګډون د نړیوالو رسنیو د راپورونو له مخې، دا قضیه د نشهيي موادو د قاچاق او ترهګرۍ اړوندو تورونو باندې ولاړه ده؛ هغه تورونه چې مادورو یې «بېاساسه» بللي او په ښکاره ډول یې رد کړي دي. هغه په محکمې کې وویل چې د لومړي ځل لپاره یې پدې ځای کې د دعوې لیک ولیده او غوره ګڼي چې خپله شخصاً یې ولولي.
د نیویارک ټایمز د راپور له مخې، د محکمې قاضي د بلې ناستې نېټه د مارچ ۱۷مه ټاکلې ده او مادورو ته یې ويلي چې د خپل هېواد له قونسلګرۍ سره د اړیکې حق لري؛ هغه حق چې نوموړي او د هغه مېرمن غوښتنه وکړه ترې ګټه واخلي. د انبيسي شبکې راپور ورکړی چې د مادورو وکیل د راتلونکې لپاره د ضمانت پر بنسټ د خوشې کېدو غوښتنه کړې ده.
د راپورونو له مخې، د محکمې غونډه شاوخوا ۳۰ دقیقې روانه وه او مادورو د خپلې مېرمنې سره یوځای له محکمې تر ختمېدو وروسته ووت. دغه قضیه د سیاسي او حقوقي پراخو نړیوالو غبرګونونو لامل شوې او جدي پوښتنې یې راپورته کړې دي چې د یوه موجود ولسمشر د نیونې، لېږد او قضایي چلند څرنګوالی په نښه کوي.
