په کندز کې د امارت لومړنی د تېلو ټانک رسماً پرانیستل شو
په کندز ولایت کې د امارت لومړنی د تېلو ټانک د ۲۱ ملیونه افغانیو په لګښت پرانیستل شو او په رسمي ډول یې فعالیت پیل کړ. د طالبانو د ادارې سیمهییز چارواکي وایي، دا مرکز د لوړ کیفیت او مناسب قېمت تېلو د وړاندې کولو په موخه جوړ شوی دی.
د دغو چارواکو په وینا، ټاکل شوې ده چې دا د تېلو ټانک د خصوصي شرکتونو سره په سیالۍ کې د کندز اوسېدونکو ته اړین سون توکي برابر کړي. هغوی ټینګار کړی چې د بازار د نرخونو څخه په ټیټه بیه د تېلو وړاندې کول د دغه پروژه له مهمو لومړیتوبونو څخه دی.
کندز د افغانستان په شمال ختیځ کې یو مهم ولایت دی چې د خپل ترانزیټي موقعیت له امله د سون توکو د خدمتونو پراخ ضرورت لري. په تېر کې د دې ولایت اوسېدونکو څو ځله د تېلو د بیو د نوسان او د ټیټې کیفیت له امله شکایتونه کړي دي.
خو یو شمېر اقتصادي شنونکي باور لري چې د طالبانو د ادارې مستقیم ګډون د سون توکو په بازار کې د مدیریت شفافۍ او دقیقې څارنې ته اړتیا لري، څو له خصوصي سکتور سره سالمه سیالي وساتل شي او د انحصار یا اقتصادي بېعدالتۍ مخه ونیول شي.
