د افغانستان سره د سوداګریزو لارو تړل کېدو د خیبر پښتونخوا عواید کم کړي
د پاکستان رسنیو راپور ورکړی چې د افغانستان او پاکستان ترمنځ د اکتوبر له میاشتې راهيسې د سوداګریزو لارو تړل پاتې کېدو د خیبر پښتونخوا ایالت عوایدو ته محسوس زیان رسولی دی. د دغو راپورونو له مخې، د دغه ایالت د حکومت عواید د بنسټیزو پروژو د پراختیا د محصول (IDC) له پلوه د تېر کال په پرتله په ښکاره ډول کم شوي دي.
د پاکستان «ډان» ورځپاڼې د رسمي اسنادو له خولې لیکلي چې د روان مالي کال په لومړیو اوو میاشتو کې د بنسټیزو پروژو د پراختیا له محصول څخه عواید له ۷.۴۲ میلیارده پاکستانیو روپیو څخه ۳.۴۸ میلیارده روپیو ته راکم شوي چې دا له پنځوس سلنې ډېره کموالی ښيي.
د راپور له مخې، مزمل اسلم، د خیبر پښتونخوا د وزیراعلی مالي سلاکار، په یوه څلور مخیز لیک کې د پاکستان د سوداګرۍ وزیر جام کمال څخه غوښتي چې د ایالتي او فدرالي چارواکو ګډه بېړنۍ ناسته جوړه کړي. د دې غوښتنې موخه د سوداګریزو لارو د تړل کېدو اقتصادي اغېزو ته د حل لاره موندل ښودل شوې ده.
راپور زیاتوي چې تمه ده په دغه غونډه کې به د عوایدو د کمېدو اغېز پر د خیبر پښتونخوا پر اقتصاد او د سوداګرو او صادرونکو پر ستونزو، لکه ځنډېدلې پیسې او د سوداګریزو فعالیتونو کمېدل، جدي بحث وشي. راپور زیاتوي چې دا وضعیت په داسې حال کې دوام لري چې د پاکستاني چارواکو او د طالبانو د ادارې ترمنځ د پولو په مدیریت کې د مؤثرې همغږۍ نشتوالی لا هم د سوداګرۍ د دوامدار بحران له اصلي لاملونو څخه ګڼل کېږي.
