خليلزاد: د پاکستان خلک د خپل حکومت له وژونکو تګلارو ملاتړ نه کوي
زلماي خليلزاد، د افغان سولې لپاره د امريکا پخواني استازي، ويلي دي چې نه باور لري د پاکستان خلک د هغه حکومت له تګلارو ملاتړ وکړي چې د افغان ملکي وګړو د وژل کېدو لامل شوی دی. نوموړي زياته کړې چې د پاکستان د خلکو او واکمنې جوړښت ترمنځ واټن په زياتېدو دی.
د طالبانو د ادارې د مرستيال وياند، حمداﷲ فطرت، پرون په کابل کې وويل چې د پاکستان پوځي رژيم ته منسوب بريدونو کې ۱۱۰ ملکي وګړي، چې ښځې او ماشومان هم پکې شامل دي، وژل شوي او ۱۲۳ تنه نور ټپيان دي. د هغه په وينا، د دغو بريدونو له امله ۸۴۰۰ کورنۍ له خپلو سيمو بېځايه شوې دي.
خليلزاد نن چهارشنبه په خپل اېکس پاڼه کې وليکل: «زه باور نه لرم چې د پاکستان خلک د خپل حکومت له تګلارو ملاتړ وکړي؛ تګلارې چې د افغان ملکي وګړو د وژنې سبب شوې دي.» هغه ټينګار وکړ چې د پاکستان د خلکو نظر بايد د حکومت د ادارو له کړنو سره يو شان ونه ګڼل شي.
دغه پخواني امريکايي ډيپلوماټ، د ملګرو ملتونو د وروستيو راپورونو په يادولو سره چې د پاکستان هوايي بريدونو له امله د افغان ملکي وګړو د مرګژوبلې د زياتېدو راپور ورکوي، پوښتنه وکړه چې آيا د خلکو او واکمنۍ ترمنځ واټن په پاکستان کې زياتېږي؟ نوموړي ځواب ورکړ چې د ده په باور دا واټن رښتيا هم په زياتېدو دی.
د ملګرو ملتونو تازه راپورونه هم ښيي چې د دواړو هېوادونو ترمنځ د وروستيو تاوتريخوالو په پايله کې د ملکي تلفاتو شمېر زيات شوی، هغه حالت چې د سيمې د بشري او امنيتي اغېزو په اړه اندېښنې زياتې کړې دي.
