د اسلاماباد د رول پر اړه پوښتنې؛ خليلزاد د پاکستان د دفاع وزير د څرګندونو په غبرګون کې
زلماي خليلزاد، د افغانستان د سولې لپاره د امريکا پخواني ځانګړي استازي، د پاکستان د دفاع وزير د وروستيو څرګندونو په غبرګون کې پوښتنه راپورته کړې ده چې آيا اسلاماباد د افغانستان د جګړې پر مهال د «دوهګونې لوبې» پاليسي تعقيبولې که نه؟
خواجه آصف، د پاکستان د دفاع وزير، تازه په خپل هېواد کې د پارلمان غونډې ته ويلي چې اسلاماباد د ۱۱ سپتمبر له بريدونو وروسته په عملي ډول «خپل ځان د متحده ايالاتو په کرايه ورکړ» او د واشنګټن په مشرۍ د ترهګرۍ ضد جګړه کې له امريکا سره يو ځای شو.
خليلزاد د يادېدونکو څرګندونو په تړاو وويل، پاکستان په هغه وخت کې له متحده ايالاتو نه مالي او پوځي مرستې ترلاسه کولې، خو په عين حال کې پرې تور لګېده چې هغو ډلو ته يې خوندي ځایونه برابر کړي وو چې د امريکايي ځواکونو او د هغوی د متحدانو پر وړاندې په افغانستان کې جنګېدل. هغه پوښتنه وکړه چې آيا دا حالت د جګړې د دواړو لوريو په لړ کې د يو وخت رول لوبول نه ښيي؟
د امريکا پخواني استازي دا احتمال هم ياد کړ چې ښايي د پاکستان چارواکو د امريکا ضد جنګېدونکو ته د پناهځای ورکولو په بدل کې له نورو قدرتونو هم کوم امتياز يا «کرايه» اخيستې وي. د ده په وينا، د دغو پوښتنو روښانه ځوابونه کولای شي د افغانستان د جګړې پر مهال د سيمهييزو پاليسيو د دقيق درک مرسته وکړي.
يادې څرګندونې يوه ورځ وروسته شوي، له هغې وروسته چې د پاکستان د دفاع وزير ويلي وو، د افغانستان تېرې جګړې زياتره د سياسي موخو لپاره پر مخ وړل شوې وې، نه د دې هېواد د اوږدمهاله ثبات د تضمين لپاره.
