د کینیا صدراعظم د لوېدیځې آسیا د جګړې د اقتصادي پایلو په اړه خبرداری ورکړ
د کینیا صدراعظم او د بهرنیو چارو وزیر، موسالیا موداوادي، خبرداری ورکړی چې د لوېدیځې آسیا د جګړې دوام به د افریقایي هېوادونو پر اقتصاد پراخ منفي اغېز وکړي. نوموړي دغه څرګندونې په یوه څېړنیز مرکز کې وکړې او ټینګار یې وکړ چې د سیمې هېوادونه باید د نړېوالو کړکېچونو د اغېزو د کمولو لپاره چمتووالی ولري.
ده وویل، روان کړکېچ په لوېدیځې آسیا کې ښيي چې افریقایي هېوادونه باید د عرضې ځنځیرونه متنوع کړي او د افریقا د قارهي ازادې سوداګرۍ تړون بشپړ پلي کول چټک کړي. موداوادي زیاته کړه چې دا ډول اقدامات کولی شي د اقتصادي وابستګۍ کچه راټيټه کړي او د افریقایي اقتصادونو وړتیا د بهرنیو تکانونو پر وړاندې لوړه کړي.
د کینیا صدراعظم همدارنګه په نوې کېدونکو انرژۍ ته د تګ د چټکولو غوښتنه وکړه. ده وویل که د افریقا ډېره برخه اړتیا وړ انرژي د لمر، ځمکني تودوخې او اوبو له پاکو سرچینو برابره کړې وای، د لوېدیځې آسیا د کړکېچ بېثباتي رامنځته کوونکی اغېز به دومره څرګند نه وای.
موداوادي په خپلو خبرو کې دا هم وویل چې د معاملو پر بنسټ کړنلارې او نظاميتوب تمایل په نړېواله کچه د ډیپلوماسۍ او سولهیزې همژوندۍ دودیز اصول تر سیوري لاندې راوستي دي. د ده په باور، د نړېوالو اړیکو بنسټیز ارزښتونه لکه د بشر حقونه او پر قانون ولاړ نړېوال نظم له جدي ننګونو سره مخ دي.
