کرزي د پاکستان هوايي بریدونه پر کابل وغندل
حامد کرزي، د افغانستان پخواني ولسمشر، هغه سخت هوايي بریدونه چې پاکستان ته منسوب شوي دي او د کابل پر ځينو برخو ترسره شوي، په کلکو ټکو وغندل. ده وویل چې دا بریدونه د استوګنيزو سيمو او غيرنظامي مرکزونو هدف ګرځولي دي.
کرزي د دوشنبې شپه، د کب پر ۲۵مه، پر خپل ایکس مخپاڼه وليکل چې د دغو بمباريو په نتيجه کې، په ځانګړي ډول په استوګنيزو سيمو او ځینو روغتيايي مرکزونو کې، ملکي وګړو ته مرګژوبله او مالي زيانونه اوښتي دي. نوموړي ټينګار وکړ چې د غيرنظامي هدفونو په نښه کول د نړيوالو منل شوو اصولو خلاف دي.
پخواني ولسمشر همدارنګه د پاکستان پوځ ته خبرداری ورکړ چې د دغسې بریدونو دوام به نه يوازې دوی خپلو موخو ته وانهرسوي، بلکې د دغه هېواد وضعيت به لا پسې پېچلی کړي. د ده په وينا، د پوځي شخړو دوام د موجودو بحرانونو حل نهشي کېدای.
کرزي زياته کړه که پاکستان غواړي چې په سیمه کې ثبات او خپل ملي ګټې خوندي وساتي، نو بايد خپلې تګلارې له سره وڅېړي او له افغانستان سره اړیکې د ښې ګاونډيتوب او متمدن تعامل پر بنسټ تنظيم کړي.
دا څرګندونې په داسې حال کې شوې چې د دوشنبې شپه د کابل په ځینو برخو کې د هوايي بریدونو او درندو چاودنو راپورونه خپاره شول. د پلازمېنې یو شمېر اوسېدونکو ويلي چې دوی د څو چاودنو او ورپسې د ټوپکوالو ډزو غږونه اورېدلي دي.
