د کریم خرم غبرګون د جفري اپسټین د دوسیې د اسنادو افشا ته
کریم خرم، د پخواني جمهوریت په نظام کې د اطلاعاتو او فرهنګ وزیر، د جفري اپسټین د دوسیې میلیونونو اسنادو افشا د لویدیځ په سیاست او پانګوالۍ کې د اخلاقي سقوط نښه بللې ده.
هغه ویلي، له دې اسنادو د خپرېدو وروسته، لویدیځ سیاستوال نور نشي کولای د اخلاق، دموکراسۍ، عدالت او بشري حقونو په اړه له بره دریځ څخه خبرې وکړي. د ده په باور، دا دوسیه د لویدیځو قدرت لرونکو ادعاوو ته یو بل انځور وړاندې کوي.
خرم همدارنګه د غزې جګړې ته په احتیاط سره په اشارې ویلي چې د دې جګړې پېښې د عامو خلکو له نظره د پټېدو وړ نهدي، او د اپسټین د دوسیې له افشا سره یوځای د لویدیځ سیاست جوړونکو د اخلاقي چلند په اړه جدي پوښتنې راپورته کړې دي.
هغه ټینګار کړی چې د ده هدف د لویدیځو هېوادونو عادي خلک نه دي، او زیاته کړې یې ده چې د دغو هېوادونو اوسېدونکو په بېلابېلو مواردو کې، په ځانګړي ډول د غزې جګړې په تړاو، څو ځله د بېعدالتۍ پر ضد اعتراض کړی او سړکونو ته راوتلي دي.
دا څرګندونې په داسې حال کې شوې دي چې د متحده ایالاتو د عدلیې وزارت د جنجالي پانګوال جفري اپسټین، چې د جنسي قاچاق په تور تورن و، میلیونونه اړوند اسناد خپاره کړي دي. د دې دوسیې د جزیاتو افشا د لویدیځ یو شمېر مطرح سیاسي او اقتصادي څېرو ته اخلاقي او حقوقي ستونزې رامنځته کړي دي.
